فرمان الہی
نماز کے اوقات
اسلام آباد، راولپنڈی (نیوز رپورٹر، نمائندہ جنگ) پاکستان تحریک انصاف کے بانی چیئرمین و سابق وزیراعظم عمران خان کیلئے ایک دن میں دو ریلیف، وفاقی وزیر پارلیمانی امور فضل چوہدری نے کہا کہ صحت کے پیش نظر عمران خان کو اسپتال منتقل کرنے کا فیصلہ کیا گیا ہے، بیٹوں سے بھی انکی بات کرادی گئی۔
انہوں نے کہا کہ حکومت انسانی ہمدردی اور قانونی تقاضوں کو مقدم رکھتی ہے، عمران خان کی بیماری اور علاج کیلئے میڈیکل بورڈ بھی تشکیل دینے کا فیصلہ کیا گیا ہے۔
وفاقی وزیر اطلاعات عطا تارڑ کا کہنا ہے کہ عمران خان کی آنکھ کا علاج ماہرین امراض چشم ایک خصوصی ادارے میں کرینگے، پی ٹی آئی کے سلمان اکرم راجہ نے کہا کہ بتایا گیا ہے بانی کو شفاء انٹرنیشنل لے جانے کیلئے حکومت رضا مند ہے۔
ادھر اسلام آباد میں پی ٹی آئی کا دھرنا دوسرے روز میں جاری رہا، بیرسٹر گوہر کا کہنا ہے کہ عمران خان کو علاج کی سہولتیں ملنے تک احتجاج جاری رہے گا ، راجا ناصر عباس نے کہا ہمارا کھانا پانی بند ہے مگر ہار نہیں مانیں گے۔
تفصیلات کے مطابق وفاقی وزیر برائے پارلیمانی امور ڈاکٹر طارق فضل چوہدری نے کہا ہے کہ بانی پی ٹی آئی کو اپنے بیٹوں سے فون پر بات کرنے کی سہولت فراہم کی گئی ہے اور انکی صحت کے پیش نظر انہیں ہسپتال منتقل کرنے اور میڈیکل بورڈ تشکیل دینے کا فیصلہ بھی کیا گیا ہے۔
ہفتہ کو سماجی رابطے کی ویب سائٹ ایکس پر پوسٹ کرتے ہوئے وفاقی وزیر نے کہا کہ ہر قیدی کو قانون کے مطابق سہولیات فراہم کرنا حکومت کی ذمہ داری ہے۔
انہوں نے کہا کہ صحت جیسے حساس معاملے پر سیاست نہیں ہونی چاہیے، تحریک انصاف کو چاہیے کہ بے بنیاد پروپیگنڈا یا سیاسی پوائنٹ اسکورنگ سے گریز کریں۔
طارق فضل چوہدری نے کہا کہ حکومت اپنی ذمہ داریاں پوری کر رہی ہے، اس معاملے کو سیاست کی نذر کرنے کی بجائے قومی سنجیدگی اور برداشت کا مظاہرہ کریں۔
علاوہ ازیں عمران خان کی انکے بیٹوں سے ٹیلی فون پر بات کرادی گئی۔ ذرائع کے مطابق سینٹرل جیل راولپنڈی میں سزا کاٹنے والے سابق وزیراعظم عمران خان نے گزشتہ روز برطانیہ میں مقیم اپنے دو بیٹوں قاسم اور سلیمان سے بذریعہ فون بات کی۔
جیل حکام نے فون پر بات کروانے کی تصدیق کی اور کہا کہ سپریم کورٹ کے احکامات پر بچوں سے بات کرادی گئی ہے۔ ذرائع کا کہنا ہے کہ بانی پی ٹی آئی نے اپنے بیٹوں سے تقریباً آدھ گھنٹہ تفصیلی گفتگو کی۔
وفاقی وزیر اطلاعات عطاء اللّٰہ تارڑ نے عمران خان کی آنکھ کا علاج کروانے سے متعلق تفصیل بتادی۔ سماجی رابطے کی ویب سائٹ ایکس پر جاری اپنے بیان میں عطا تارڑ نے کہا کہ بانی پی ٹی آئی کی آنکھ کے جاری علاج کے تسلسل میں مزید معائنہ کیا جائے گا۔
عطا تارڑ نے کہا کہ بانی پی ٹی آئی کا ماہرینِ امراضِ چشم ایک خصوصی طبی ادارے میں علاج کرینگے، بانی پی ٹی آئی کے علاج، معائنہ کی تفصیلی رپورٹ بھی سپریم کورٹ میں جمع کروائی جائے گی۔
وزیر اطلاعات نے کہا کہ بانی پی ٹی آئی کے علاج کے معاملے پر قیاس آرائیوں سے گریز کیا جائے۔ دوسری جانب وفاقی دارالحکومت اسلام آباد میں اپوزیشن اتحاد کے احتجاجی دھرنے دوسرے روز بھی جاری رہے۔
علامہ راجہ ناصر عباس، محمود اچکزئی اور بیرسٹر گوہر پارلیمنٹ ہاؤس میں دھرنا دیے بیٹھے ہیں، سہیل آفریدی اور دیگر پی ٹی آئی رہنما کے پی کے ہاؤس میں دھرنا دیئے بیٹھے ہیں۔دونوں مقامات پر پولیس کی بھاری نفری تعینات کر دی گئی۔
اپوزیشن لیڈر سینیٹ علامہ راجہ ناصر عباس نے کہا کہ ہمارا دھرنا جاری ہے اور جاری رہے گا،ہمارا پانی اور کھانا بند کر دیا گیا ہے لیکن ہم ہار نہیں مانیں گے۔
