• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

صوبائی دارالحکومت میں شجرکاری مہم بھرپور انداز میں جاری

میرا شہر
کوئٹہ
23 مارچ ، 2026
کوئٹہ (اسٹاف رپورٹر)ضلعی انتظامیہ کوئٹہ کے زیرِ اہتمام "کوئٹہ کلین اینڈ گرین انیشیٹو 2026" کے تحت صوبائی دارالحکومت میں شجرکاری مہم بھرپور انداز میں جاری ہے، جس کا مقصد شہر کو سرسبز و شاداب بنانا اور ماحولیاتی آلودگی پر قابو پانا ہے۔اس سلسلے میں ضلعی انتظامیہ اور روٹری کلب کی مشترکہ ٹیمیں کوئٹہ کے مختلف علاقوں میں شجرکاری سرگرمیوں میں مصروف ہیں۔ شہر کے اہم شاہراہوں، پارکوں، تعلیمی اداروں، رہائشی علاقوں اور خالی پلاٹس میں پودے لگائے جا رہے ہیں تاکہ نہ صرف ماحول کو بہتر بنایا جا سکے بلکہ شہریوں کو صاف اور صحت مند فضا بھی فراہم کی جا سکے۔ضلعی انتظامیہ کے حکام کا کہنا ہے کہ اس مہم کا مقصد موسمیاتی تبدیلیوں کے اثرات کو کم کرنا، درجہ حرارت میں کمی لانا اور شہریوں میں شجرکاری کے حوالے سے شعور اجاگر کرنا ہے۔انہوں نے کہا کہ درخت نہ صرف ماحول کو آلودگی سے پاک رکھتے ہیں بلکہ انسانی صحت پر بھی مثبت اثرات مرتب کرتے ہیں۔روٹری کلب کے نمائندوں نے بھی اس موقع پر اس عزم کا اظہار کیا کہ وہ ضلعی انتظامیہ کے ساتھ مل کر شہر کی خوبصورتی اور ماحولیاتی بہتری کے لیے اپنا کردار ادا کرتے رہیں گے۔ انہوں نے شہریوں سے اپیل کی کہ وہ اس مہم میں بڑھ چڑھ کر حصہ لیں اور اپنے گھروں، محلوں اور اردگرد کے علاقوں میں زیادہ سے زیادہ پودے لگائیں۔ضلعی انتظامیہ نے اس بات پر بھی زور دیا کہ لگائے گئے پودوں کی دیکھ بھال انتہائی ضروری ہے، اس لیے متعلقہ اداروں اور شہریوں کو چاہیے کہ وہ ان پودوں کی حفاظت اور آبیاری کو یقینی بنائیں تاکہ یہ مہم دیرپا نتائج دے سکے۔شہر کے مختلف مکاتب فکر سے تعلق رکھنے والے افراد نے اس اقدام کو سراہتے ہوئے اسے ایک مثبت اور خوش آئند قدم قرار دیا ہے، جس سے نہ صرف کوئٹہ کا ماحول بہتر ہوگا بلکہ آنے والی نسلوں کو بھی ایک صاف اور سرسبز ماحول میسر آئے گا۔
کوئٹہ سے مزید