فرمان الہی
نماز کے اوقات
اسلام آباد (طاہر خلیل ، نیوز ایجنسیاں ):وفاقی وزیر برائے انسانی حقوق سینیٹر اعظم نذیر تارڑ نے کہا ہے کہ پاکستان میں او آئی سی کی خواتین کے امور پر نویں وزارتی کانفرنس کامیابی سے اختتام پذیر ہوگئی جس کے بعد تنظیم کی سربراہی پاکستان کو منتقل ہو گئی ۔ پاکستان کیلئے اعزاز کے ساتھ یہ ایک اہم ذمہ داری بھی ہے ، پاکستان تمام رکن ریاستوں کے تعاون سے مسلم خواتین کی سماجی، معاشی اور سیاسی ترقی کے لیے فعال کردار ادا کرے گا،انہوں نے کہا کہ دو روزہ اجلاس کے دوران ہونے والی مشاورت اور سفارشات کو رکن ممالک نے متفقہ طور پر منظور کرتے ہوئے اس عزم کا اعادہ کیا کہ مسلم دنیا کی خواتین کو معاشی، سیاسی اور سماجی میدانوں میں بااختیار بنایا جائے گا تاکہ وہ مردوں کے شانہ بشانہ اپنے ممالک اور خطوں کی ترقی میں موثر کردار ادا کر سکیں۔وہ پیر کو او آئی سی کی خواتین کے امور پر نویں وزارتی کانفرنس کے بعد پریس کانفرنس سے خطاب کررہے تھے، ادھر کانفرنس سے خطاب کرتے ہوئے چیئرمین سینیٹ یوسف رضا گیلانی نے کہا ہے کہ خواتین کو بااختیار بنانااسلام کی بنیادی تعلیمات اور اجتماعی ذمہ داری کا تقاضا بھی ہے،وزیر انفارمیشن ٹیکنالوجی شزہ فاطمہ خواجہ نے کہا کہ خواتین کو محض ٹیکنالوجی حاصل کرنے تک محدود نہیں رہنا چاہیے۔تفصیلات کے مطابق وفاقی وزیر اعظم نذیر تارڑ نے مزید کہا کہ او آئی سی کے تمام رکن ممالک، سیکرٹری جنرل اور شریک وفود نے کانفرنس کو کامیاب بنانے میں بھرپور تعاون کیا۔
