• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

اکیسویں صدی میں دنیا بہ ظاہر سائنسی ترقی، جدید ٹیکنالوجی، معاشی وسعت اور مواصلاتی انقلاب کے ایک نئے دور میں داخل ہو چکی ہے، لیکن اس ترقی کے باوجود عالمی سطح پر بے چینی، سیاسی عدم استحکام، معاشی ناہم واری اور احتجاجی تحریکوں میں اضافہ ایک اہم مسئلہ بن کر سامنے آیا ہے۔ دنیا کے مختلف خِطّوں میں عوام اپنے حقوق، آزادی، انصاف، معاشی تحفظ اور بہتر مستقبل کے لیے آواز بلند کر رہے ہیں۔

کہیں منہگائی اور بے روزگاری کے خلاف احتجاج ہو رہا ہے، کہیں سیاسی آزادی اور جمہوری حقوق کا مطالبہ کیا جا رہا ہے، اور کہیں نسلی امتیاز، بدعنوانی، ماحولیاتی تباہی اور ریاستی جبر کے خلاف عوام سڑکوں پر نکل رہے ہیں۔

یہ صورتِ حال محض چند ممالک کا داخلی مسئلہ نہیں، بلکہ ایک عالمی رجحان کی شکل اختیار کر چکی ہے۔ اس کے پیچھے معاشی مشکلات، سیاسی نظاموں پر عدم اعتماد، سماجی ناانصافی، عالمی طاقتوں کی کش مکش اور عوام کی بڑھتی ہوئی توقعات جیسے متعدد عوامل کارفرما ہیں۔

اس لیے ضروری ہے کہ دنیا بھر میں پائی جانے والی بے چینی اور احتجاجی تحریکوں کا غیر جانب دارانہ جائزہ لیا جائے، ان کے بنیادی اسباب کو سمجھا جائے اور ان کے ممکنہ نتائج کا تجزیہ کیا جائے۔

جنگ کی قیمت دنیا بھر کے بازاروں، کارخانوں، کھیتوں اور گھروں میں بھی ادا کی جاتی ہے

دنیا کے نقشے پر دو مختلف خِطّوں میں جاری جنگوں نے عالمی معیشت کے سامنے یہ بنیادی سوال رکھ دیا ہےکہ کیا آج کی باہم مربوط دنیا میں کوئی جنگ صرف دو یا چند ممالک تک محدود رہ سکتی ہے؟ یوکرین کے میدانِ جنگ سے لے کر مشرقِ وسطیٰ کے تیل بردار بحری راستوں تک، جنگوں کے اثرات اب صرف فوجی نقصانات اور سیاسی کشیدگی کی صورت میں نہیں بلکہ پیٹرول کی قیمتوں، اشیائے خورونوش کے نرخوں، عالمی تجارت، سرمایہ کاری اور عام انسان کے گھریلو بجٹ میں بھی محسوس کیے جا رہے ہیں۔

روس اور یوکرین کے درمیان فروری 2022ء میں شروع ہونے والی وسیع جنگ نے توانائی، گندم، کھاد اور عالمی تجارتی نظام کو متاثر کیا۔ دوسری جانب 2026ء میں ایران کے خلاف امریکا اور اسرائیل کی فوجی کارروائیوں اور آبنائے ہرمز میں خلل نے توانائی کی عالمی فراہمی اور اقتصادی استحکام کے لیے نئے خطرات پیدا کیے۔ ان دونوں جنگوں کے اسباب، جغرافیائی حالات اور اقتصادی اثرات مختلف ہیں، لیکن ان کے نتیجے میں یہ مشترک حقیقت سامنے آئی ہےکہ جنگ کی قیمت صرف میدانِ جنگ میں نہیں، بلکہ دنیا بھر کے بازاروں، کارخانوں، کھیتوں اور گھروں میں بھی ادا کی جاتی ہے۔

عالمی بینک کی جون 2026ء کی رپورٹ کے مطابق، مشرقِ وسطیٰ کے تنازعے سے پیدا ہونے والے توانائی کے بحران نے عالمی معاشی امکانات کو متاثر کیا، اور عالمی اقتصادی ترقی کی شرح 2025ء کے اندازاً 2.9 فی صد سے کم ہو کر 2026ء میں 2.5 فی صد رہنے کی پیش گوئی کی گئی۔

یہ پیش گوئی اس مفروضے پر مبنی تھی کہ توانائی کی رسد میں شدید رکاوٹیں سال کے دوران بہ تدریج کم ہوں گی،تاہم صورتِ حال زیادہ خراب ہونے کی صورت میں نتائج مزید سنگین ہو سکتے ہیں۔ یہ صورتِ حال واضح کرتی ہے کہ عالمی معیشت کی صحت کا انحصار اب صرف صنعتی پیداوار، مالیاتی پالیسی یا ملکی وسائل پر نہیں، بلکہ بین الاقوامی امن، محفوظ تجارتی راستوں اور توانائی کی مسلسل فراہمی پر بھی ہے۔

دنیا بھر میں عوامی احتجاج کی مختلف شکلیں 

آج دنیا کے مختلف ممالک میں عوامی احتجاج مختلف شکلوں میں سامنے آ رہا ہے۔ کہیں طلبہ تعلیمی اصلاحات اور بہتر مستقبل کے لیے مظاہرے کر رہے ہیں، کہیں مزدور اپنے حقوق اور مناسب اجرت کے لیے آواز اٹھا رہے ہیں، کہیں کسان زرعی پالیسیوں اور معاشی مشکلات کے خلاف احتجاج کر رہے ہیں اور بعض ممالک میں شہری حکومتوں سے شفاف انتخابات، بنیادی آزادیوں اور بدعنوانی کے خاتمے کا مطالبہ کر رہے ہیں۔

مشرقِ وسطیٰ میں سیاسی حقوق، معاشی مشکلات اور علاقائی تنازعات نے کئی معاشروں کو متاثر کیا ہے۔ افریقی ممالک کے بعض حصوں میں منہگائی، بے روزگاری، بدعنوانی اور حکومتی کارکردگی پر عدم اطمینان عوامی احتجاج کا سبب بنتا رہا ہے۔ یورپ میں منہگائی، ہجرت، زرعی پالیسیوں اور سماجی بہبود سے متعلق معاملات پر مظاہرے دیکھنے میں آئے ہیں۔ ایشیا میں بھی سیاسی نمائندگی، روزگار، شہری آزادیوں اور معاشی انصاف کے مطالبات مختلف تحریکوں کی صورت میں سامنے آتے رہے ہیں۔

اسی طرح امریکا اور لاطینی امریکا کے متعدد ممالک میں نسلی انصاف، معاشی ناہم واری، حکومتی پالیسیوں اور عوامی حقوق سے متعلق مسائل نے احتجاجی سرگرمیوں کو جنم دیا ہے۔ تاہم یہ بات اہم ہے کہ تمام احتجاجی تحریکوں کی نوعیت اور مقاصد یک ساں نہیں ہوتے۔

بعض تحریکیں جمہوری اصلاحات اور بنیادی حقوق کے لیے ہوتی ہیں، بعض مخصوص معاشی مطالبات پر مبنی ہوتی ہیں اور بعض سیاسی تقسیم، نظریاتی اختلافات یا نسلی و مذہبی کشیدگی سے متاثر ہوتی ہیں۔

عوام ہرطرف بے چین ہیں

ایک برس میں دنیا کے57سے زائد ممالک میں حکومت مخالف 107سے زیادہ نمایاں احتجاجی تحریکیں سامنے آئی ہیں۔ منہگائی، معاشی بدحالی، ایندھن کی بڑھتی قیمتوں، رہائش کے اخراجات، کفایت شعاری، سیاسی عدم اعتماد اور جمہوری حقوق پر تنازعات نے عوامی بے چینی کو ہوا دی ہے۔

عالمی احتجاجی ریکارڈ میں ایشیا، یورپ، افریقا، مشرق وسطیٰ اور لاطینی امریکا کے ممالک شامل ہیں۔ یورپ میں معاشی دباؤ اور رہائشی مسائل، ایشیا میں انتخابی شفافیت اور سیاسی نمائندگی، افریقا میں منہگا ایندھن، مشرق وسطیٰ میں جنگوں، پابندیوں اور سرکاری خدمات سے متعلق لوگوں کو شکایات ہیں۔

لاطینی امریکا میں مالیاتی پالیسیوں، تعلیم اور سیاسی عدم استحکام کے خلاف احتجاج ہواہے۔ امریکی تحقیقی ادارےکے عالمی احتجاجی ریکارڈ کے مطابق یہ اعدادوشمار دنیا بھر میں بڑھتی ہوئی عوامی بے چینی کی نشان دہی کرتے ہیں۔ تاہم مختلف ممالک میں احتجاج کے اسباب، نوعیت اور شدت ایک دوسرے سے مختلف ہیں۔

معاشی ناہم واری اور دولت کی غیر منصفانہ تقسیم اس بے چینی کا بہت اہم سبب بتائی جاتی ہے۔ بہت سے ممالک میں دولت اور وسائل کا بڑا حصہ معاشرے کے محدود طبقے کے پاس جمع ہو رہا ہے اوردوسری جانب عام شہری بنیادی ضروریات پوری کرنے کے لیے جدوجہد کر رہے ہیں۔ ایک طرف بڑی کمپنیوں اور دولت مند طبقوں کے اثاثوں میں اضافہ ہوتا ہے تو دوسری طرف عام آدمی کو رہائش، تعلیم، علاج اور خوراک کے اخراجات پورے کرنے میں مشکلات پیش آرہی ہیں۔

جب عوام کو یہ محسوس ہونے لگے کہ معاشی ترقی کے ثمرات منصفانہ طور پر تقسیم نہیں ہو رہے تومعاشرتی اضطراب بڑھنے لگتا ہے۔ معاشی ناہم واری صرف آمدن کے فرق کا نام نہیں بلکہ مواقعے کی عدم مساوات بھی اس کا اہم پہلو ہے۔ 

اگر غریب طبقے کے بچوں کو معیاری تعلیم، بہتر روزگار اور ترقی کے یک ساں مواقع میسر نہ ہوں تو محرومی کا احساس نسل در نسل منتقل ہو سکتا ہے۔ یہی احساس بعض اوقات احتجاجی تحریکوں کی شکل اختیار کر لیتا ہے۔

منہگائی،بے روزگاری اور معاشی عدم تحفظ نے بھی لوگوں کو جھنجھوڑا ہے۔ خوراک، توانائی، رہائش اور دیگر ضروری اشیا کی قیمتوں میں اضافہ عام شہری کی زندگی کو بہ راہِ راست متاثر کرتا ہے۔ جب آمدن میں اضافہ نہ ہو لیکن اخراجات مسلسل بڑھتے رہیں تو لوگوں کی قوتِ خرید کم ہو جاتی ہے۔

خصوصاً نوجوانوں میں بے روزگاری اور مناسب ملازمتوں کی کمی مایوسی کو جنم دیتی ہے۔ تعلیم حاصل کرنے کے باوجود روزگار نہ ملنا، کم اجرت پر کام کرنا اور مستقبل کے بارے میں غیر یقینی صورتِ حال نوجوان نسل کو نظام سے بدظن کر سکتی ہے۔

معاشی مشکلات اس وقت مزید سنگین ہو جاتی ہیں جب حکومتیں عوام کو ریلیف فراہم کرنے میں ناکام رہیں یا ان کی پالیسیوں کا بوجھ زیادہ تر کم آمدن والے طبقوں پر پڑے۔ ایسی صورت میں منہگائی کے خلاف شروع ہونے والا احتجاج وسیع تر سیاسی تحریک میں تبدیل ہو سکتا ہے۔

خوش حالی کے براعظم میں بے یقینی کے سائے 

آج یورپ جیسے خوش حالی کے براعظم میں بے یقینی کے سائے ہیں۔یورپ کو طویل عرصے تک امن، جمہوریت، معاشی خوش حالی، انسانی حقوق اور مستحکم طرزِ زندگی کی علامت سمجھا جاتا رہا ہے۔ دوسری عالمی جنگ کی تباہ کاریوں سے نکل کر یورپی ممالک نے باہمی تعاون، معاشی اشتراک اور سیاسی مفاہمت کے ذریعے ایک ایسا نظام قائم کیا جس نے کئی دہائیوں تک براعظم کو استحکام فراہم کیا۔

یورپی یونین کا قیام اسی تجربے کا نتیجہ تھا کہ جنگوں، قومی رقابتوں اور اقتصادی تصادم کے بجائے تعاون کو ترجیح دی جائے۔ لیکن اکیسویں صدی کی تیسری دہائی میں یورپ ایسی صورتِ حال سے گزر رہا ہے جس میں مادّی ترقی کے باوجود مستقبل کے بارے میں تشویش بڑھ رہی ہے۔

کہیں منہگائی اور رہائش کے اخراجات عام آدمی کی قوتِ خرید کو متاثر کر رہے ہیں، کہیں روس اور یوکرین کی جنگ نے سلامتی کے پرانے تصورات کو بدل دیا ہے، کہیں امیگریشن اور قومی شناخت کے سوالات سیاسی کشیدگی پیدا کر رہے ہیں اور کہیں مصنوعی ذہانت، موسمیاتی تبدیلی اور عالمی طاقتوں کی رقابت مستقبل کے بارے میں سوالات اٹھا رہی ہے۔

آج یورپ میں احتجاج کے مناظر نظر آتے ہیں، حالاں کہ وہاں مجموعی معاشی اشاریے ٹھیک ہیں، تاہم حقیقی زندگی کے اشاریے بگڑ چکے ہیں۔ فرانس میں حکومتی پالیسیوں اور کفایت شعاری کے خلاف احتجاج ہورہا ہے اور عوامی غصہ بڑھنے لگاہے۔

اٹلی میں حقیقی اجرتوں میں کمی کے خلاف بے چینی ہے اور کارکنوں کے معاشی حقوق کا مطالبہ زور پکڑ گیا ہے۔ لوگ سوال کررہے ہیں کہ اسپین اور پرتگال سمیت یورپ میں معاشی ترقی کے باوجود عام شہری کا معیارِ زندگی کیوں نہیں سنبھل رہا؟حقیقت یہ ہے کہ یورپ میں معاشی ترقی کی رفتار سست ہونے، منہگائی، رہائش کے بڑھتے اخراجات اور حقیقی آمدن پر دباؤ نے عوامی بے چینی میں اضافہ کردیا ہے۔

مجموعی معاشی اشاریے بہ ظاہر مستحکم ہونے کے باوجود عام شہریوں کو خوراک، توانائی اور کرایوں کے اخراجات پورے کرنے میں مشکلات کا سامنا ہے جس کی وجہ سے مختلف ممالک میں احتجاجی تحریکوں کو تقویت مل رہی ہے۔2015ء سے 2019 کے دوران یورو زون کی معیشت نسبتاً مستحکم ترقی کے مرحلے سے گزری۔ اس عرصے میں مجموعی ملکی پیداوار کی شرح نمو 2015 میں 2 فی صد، 2016 میں 1.9 فی صد، 2017 میں 2.6 فی صد اور 2018میں 1.9فی صد رہی۔ افراطِ زر نسبتاً کم تھا اور یورپی یونین میں بے روزگاری کی شرح بھی بہ تدریج کم ہورہی تھی۔

یہ بے چینی محض سیاسی نعروں یا ذرائع ابلاغ کی پیدا کردہ فضا کا نام نہیں۔ اس کے پیچھے حقیقی معاشی مشکلات، سلامتی کے خدشات، سماجی تبدیلیاں اور مستقبل سے متعلق غیر یقینی عوامل موجود ہیں۔ تاہم یہ سمجھنا بھی ضروری ہے کہ پورا یورپ ایک ہی کیفیت میں مبتلا نہیں۔ مختلف ممالک، طبقات اور نسلوں کے تجربات ایک دوسرے سے مختلف ہیں اور تشویش کے ساتھ امید اور اعتماد کے عناصر بھی موجود ہیں۔

یورپی پارلیمان کے 2026 کے موسمِ بہار کے سروے میں47فی صد شہریوں نے منہگائی، بڑھتی قیمتوں اور اخراجاتِ زندگی کو پارلیمان کی اولین ترجیحات میں شامل کیا، 34فی صد نے یورپی دفاع اور سلامتی کو اہم ترجیح قرار دیا۔ دوسری جانب83فی صدرائے دہندگان نے اپنے معیارِ زندگی کے بارے میں اطمینان کا اظہار کیا۔ یہ اعدادوشمار اس پے چیدہ حقیقت کی نشان دہی کرتے ہیں کہ لوگ اپنی موجودہ زندگی کے کئی پہلوؤں سے مطمئن ہونے کے باوجود مستقبل کے بارے میں فکرمند ہو سکتے ہیں۔

جنگوں نے بہت کچھ داؤ پر لگادیا

جنگ انسانی تاریخ کا ایک ایسا الم ناک باب ہے جس نے ہمیشہ انسانیت کو تباہی، بدامنی، غربت اور عدم استحکام سے دوچار کیا ہے۔ اگرچہ جنگیں عموماً مخصوص ممالک یا علاقوں میں شروع ہوتی ہیں، لیکن ان کے اثرات سرحدوں تک محدود نہیں رہتے، بلکہ پوری دنیا کو اپنی لپیٹ میں لے لیتے ہیں۔ موجودہ دور میں دنیا کے مختلف حصوں میں جاری مسلح تنازعات نے بین الاقوامی امن، عالمی معیشت، تجارت، توانائی کی فراہمی اور انسانی سلامتی کو شدید متاثر کیا ہے۔

ایران کے خلاف امریکا اور اسرائیل کی جنگی کارروائیاں اور یوکرین پر روس کے حملے کے نتیجے میں پیدا ہونے والی جنگ اس صورتِ حال کی اہم مثالیں ہیں۔یوکرین کی جنگ نے یورپ کے امن، عالمی غذائی رسد اور توانائی کی منڈیوں کو متاثر کیا۔

دوسری جانب ایران اور اس کے مخالفین کے درمیان فوجی کشیدگی نے مشرقِ وسطیٰ کے امن، تیل کی ترسیل اور عالمی سیاسی تعلقات کے حوالے سے سنگین خدشات پیدا کیے۔ ان دونوں تنازعات نے یہ حقیقت واضح کر دی ہے کہ آج کی باہم مربوط دنیا میں کسی ایک خِطّے کی جنگ بھی پوری انسانیت کے لیے مشکلات پیدا کر سکتی ہے۔ونوں کے اسباب مختلف ہیں، لیکن ان کے اثرات کئی حوالوں سے ایک دوسرے سے جُڑے ہوئے ہیں۔

یوکرین کی جنگ کے باعث روس اور مغربی ممالک کے درمیان تجارتی تعلقات متاثر ہوئے۔ روس پر عائد اقتصادی پابندیوں نے توانائی، بینکاری، تجارت اور مالیاتی نظام میں تبدیلیاں پیدا کیں۔

یورپی ممالک کو روسی گیس پر انحصار کم کرنے کے لیے متبادل ذرائع تلاش کرنا پڑے، جس سے توانائی کی قیمتوں اور صنعتی پیداواری اخراجات پر دباؤ بڑھا۔ اسی طرح ایران کے خلاف جنگی کارروائیوں نے عالمی منڈیوں میں غیر یقینی صورتِ حال پیدا کی۔

ایران اور یوکرین سے متعلق جنگوں کے عالمی اثرات میں توانائی کا مسئلہ غیر معمولی اہمیت رکھتا ہے ۔ ان جنگوں کے نتیجے میں تیل کی قیمتیں بڑھنے سے پیٹرول، ڈیزل، بجلی، کھاد اور نقل و حمل کے اخراجات میں اضافہ ہوا ہے۔ نتیجتاً اشیائے خورونوش سے لے کر صنعتی مصنوعات تک تقریباً ہر شعبہ متاثر ہو اہے۔ اس طرح اِن خِطّوں میں پیدا ہونے والی کشیدگی ہزاروں میل دور واقع ممالک کے شہریوں کی زندگیوں پر بھی اثر انداز ہوتی ہے۔

یوکرین کو دنیا کے اہم زرعی پیداوار کنندگان اور اناج برآمد کرنے والے ممالک میں شمار کیا جاتا ہے۔ وہاں جنگ کے باعث زرعی زمینوں، گوداموں، بندرگاہوں، بجلی کی فراہمی اور نقل و حمل کے نظام کو نقصان پہنچا۔ بحیرۂ اسود کے ذریعے اناج کی برآمدات میں رکاوٹوں نے عالمی غذائی منڈیوں کو متاثر کیا۔یوکرین اور روس دونوں عالمی گندم، مکئی، سورج مکھی کے تیل اور دیگر زرعی مصنوعات کی فراہمی میں اہم کردار ادا کرتے ہیں۔

جنگ کے باعث ان اشیا کی قیمتوں میں اتار چڑھاؤ پیدا ہوا، جس کا اثر ان ممالک پر زیادہ پڑا جو اپنی غذائی ضروریات پوری کرنے کے لیے درآمدات پر انحصار کرتے ہیں۔ایران کے خلاف جنگ نے بھی خوراک کی قیمتوں پر بالواسطہ اثر ڈالاہے۔ اگر تیل منہگا ہو جائے تو زرعی مشینری، کھاد، آب پاشی اور فصلوں کی نقل و حمل کے اخراجات بڑھ جاتے ہیں۔

اس کے نتیجے میں کسانوں کی پیداواری لاگت میں اضافہ اور صارفین کے لیے خوراک کی قیمتوں میں بلندی پیدا ہو سکتی ہے۔ چنانچہ ان جنگوں نے واضح کیا ہے کہ غذائی تحفظ صرف زراعت کا مسئلہ نہیں بلکہ امن، عالمی تجارت، توانائی اور سفارت کاری سے بھی گہرا تعلق رکھتا ہے۔

عالمی منظر نامہ سے مزید