کراچی: ملیر میں آپریشن، 34 افراد زیرِ حراست، 4 ملزم گرفتار

کراچی میں ملیر کے مختلف علاقوں میں پولیس اور رینجرز نے مشترکہ آپریشن کرتے ہوئے 34 سے زائد مشتبہ افراد کو حراست میں لے لیا جبکہ آپریشن کے دوران منشیات اور گٹکا فروشی میں ملوث4 ملزمان کو گرفتار بھی کیا گیا ہے۔

ایس ایس پی ملیر عرفان بہادر کے مطابق ضلع ملیر کے مختلف علاقوں میں پولیس اور رینجرز نے کومبنگ آپریشن کیا۔

کراچی: رینجرز اور پولیس کا مختلف علاقوں میں کومبنگ آپریشن

ترجمان سندھ رینجرز نے کہا کہ ابراہیم حیدری، کورنگی، سراج کالونی، لیاقت آباد، سرجانی ٹاؤن میں بھی کومبنگ آپریشن کیا گیا، جبکہ آپریشن جرائم پیشہ افراد کی موجودگی کی اطلاع پر کیا گیا۔

آپریشن گلشنِ حدید، میمن گوٹھ، مری گوٹھ، ملا عیسیٰ گوٹھ، قادر نگر، سندھی گوٹھ میں کیا گیا۔

گھر گھر تلاشی کے دوران پولیس نے 20 سے زائد مشتبہ افراد کو حراست میں لے کر متعلقہ تھانوں میں منتقل کر دیا جبکہ اس موقع پر متعدد مشتبہ افراد کے شناختی کوائف کی جانچ پڑتال بھی کی گئی۔

یہ بھی پڑھیئے: بن قاسم میں پولیس کی جانب سے کومبنگ آپریشن

دوسری جانب ابراہیم حیدری میں بھی آپریشن کیا گیا، گھر گھر تلاشی کے دوران پولیس نے منشیات فروشی اور گٹکا فروشی میں ملوث4 ملزمان کو گرفتار کر لیا۔

ابراہیم حیدری میں آپریشن کے دوران 14 مشتبہ افراد کو بھی حراست میں لیا گیا۔