• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

پشاور دھماکا، سندھ پولیس کو الرٹ رہنے کا حکم

پشاور کی دیر کالونی میں آج صبح ہونے والے بم دھماکے کے حوالے سے میڈیا رپورٹس پر آئی جی سندھ مشتاق مہر نے سندھ بھر میں پولیس کو الرٹ رہنے کے احکامات جاری کر دیئے ہیں۔

آئی جی سندھ مشتاق مہر نے اپنے حکم میں کہا ہے کہ صوبائی سطح پر سیکیورٹی کے تمام تر انتظامات کو مزید سخت کیا جائے۔

انہوں نے ہدایت کی ہے کہ پولیس پیٹرولنگ، پکٹنگ اور رینڈم اسنیپ چیکنگ کے عمل کو مؤثر اور کامیاب بنایا جائے۔

آئی جی سندھ مشتاق مہر کی جانب سے مزید کہا گیا ہے کہ ایس پیز، ڈی ایس پیز اور ایس ایچ اوز علاقوں میں اپنی موجودگی کو یقینی بنائیں۔

انہوں نے یہ بھی ہدایت کی ہے کہ تمام مساجد، امام بارگاہوں اور دیگر اہم مقامات پر سیکیورٹی کو غیر معمولی بنایا جائے۔

واضح رہے کہ پشاور کے علاقے دیر کالونی میں کوہاٹ روڈ پر واقع مسجد و مدرسے میں آج صبح دھماکا ہوا تھا جس کے نتیجے میں 8 افراد شہید جبکہ 112 زخمی ہو گئے۔

لیڈی ریڈنگ اسپتال (ایل آر ایچ ) کے ترجمان کے مطابق جاں بحق افراد کی شناخت کے بعد میتیں ورثاء کے حوالے کر دی گئی ہیں۔


ترجمان لیڈی ریڈنگ اسپتال نے بتایا کہ اسپتال میں آنے والے 40 سے زائد معمولی زخمیوں کو علاج کے بعد فارغ کر دیا گیا ہے، جبکہ زیادہ تر زخمیوں کو برن یونٹ اور ای این ٹی وارڈز میں شفٹ کیا گیا ہے۔

لیڈی ریڈنگ اسپتال انتظامیہ نے دیر کالونی دھماکے کے 96 زخمیوں کی فہرست بھی جاری کر دی ہے۔

خیبر ٹیچنگ اسپتال حکام کے مطابق دھماکے کے 4 زخمیوں کو خیبر ٹیچنگ اسپتال سے بھی فارغ کر دیا گیا ہے۔

قومی خبریں سے مزید