ڈینیئل پرل قتل، ملزمان کی رہائی کیخلاف درخواست، سیکریٹری داخلہ طلب

20 جنوری ، 2021

سندھ ہائی کورٹ نے ڈینیئل پرل قتل کیس میں بری ملزمان کو رہا نہ کرنے کے خلاف درخواست کی سماعت کرتے ہوئے سیکریٹری داخلہ اور دیگر حکام کو آئندہ سماعت پر پیش ہونے کا حکم دے دیا۔

عدالتِ عالیہ نے سیکریٹری داخلہ اور جیل حکام کے خلاف توہینِ عدالت کی ضمنی درخواست کی سماعت کی جس کے دوران ایڈووکیٹ جنرل سندھ نے عدالت کو بتایا کہ سپریم کورٹ نے ستمبر میں حکم دیا کہ آئندہ سماعت تک ملزمان کو رہا نہ کیا جائے۔

سندھ ہائی کورٹ کے جسٹس نعمت اللّٰہ پھلپھوٹو نے کہا کہ اگر معاملہ سپریم کورٹ میں ہے تو سپریم کورٹ کا حکم ہی نافذ ہو گا۔

ایڈووکیٹ جنرل سندھ نے بتایا کہ ملزمان سپریم کورٹ میں وضاحت کیلئے درخواست دائر کر چکے ہیں، ملزمان نے سندھ ہائی کورٹ میں بھی توہینِ عدالت کی درخواست دائر کر دی ہے۔

معاون وکیل نے عدالتِ عالیہ سے استدعا کی کہ احمد عمر شیخ کے وکیل مصروف ہیں اس لیے سماعت ملتوی کی جائے۔

جسٹس نعمت اللّٰہ پھلپھوٹو نے سوال کیا کہ چیف سیکریٹری سندھ کہاں ہیں؟

یہ بھی پڑھیے

ایڈووکیٹ جنرل سندھ نے جواب دیا کہ سیکریٹری داخلہ آئے ہیں، چیف سیکریٹری ذاتی وجوہات کی وجہ سے پیش نہیں ہوئے۔

سندھ ہائی کورٹ نے چیف سیکریٹری سندھ کی ایک دن کی حاضری سے استثنیٰ کی درخواست منظور کر لی۔

سندھ ہائی کورٹ نے 3 فروری کی آئندہ سماعت پر سیکریٹری داخلہ، جیل اور پولیس حکام کو پیش ہونے کا حکم دے دیا۔

تازہ ترین