میرا تعلق افغانستان سے ہے: عرشی خان

20 اگست ، 2021

بھارت کے مقبول ترین رئیلیٹی شو بگ باس کے سیزن 14 میں چیلنجرز کی حیثیت سے قدم رکھنے والی متنازع کنٹسٹنٹ عرشی خان نے انکشاف کیا ہے کہ میرا تعلق پاکستان سے نہیں بلکہ افغانستان سے ہے۔

بھارتی میڈیا رپورٹس کے مطابق عرشی خان نے اپنے حالیہ انٹرویو میں اپنی شہریت کے حوالے سے گفتگو کرتے ہوئے کہا کہ ’جب لوگ مجھے سوشل میڈیا پر میری شہریت کے حوالے سے تنقید کا نشانہ بناتے ہیں تو مجھے تکلیف ہوتی ہے۔‘

عرشی خان نے کہا کہ ’بھارتی لوگ سمجھتے ہیں کہ میرا تعلق پاکستان سے ہے اور اس وجہ سے میرا کام بھی بہت متاثر ہوتا ہے جبکہ حقیقت میں میرا تعلق افغانستان سے ہے۔‘

اُنہوں نے کہا کہ ’میں یہ بات واضح کردینا چاہتی ہوں کہ میں بھارتی شہری ہوں اور میرا شناختی کارڈ بھی بھارتی ہے لہٰذا مجھے میری شہریت کے حوالے سے تنقید کا نشانہ نہ بنائیں۔‘

عرشی خان نے کہا کہ ’ میرا تعلق افغانستان کے یوسف ظہیر پٹھان کے نسلی گروہ سے ہے، میرے دادا افغانستان سے ہجرت کرکے بھارت آئے تھے۔‘

اُن کا مزید کہنا تھا کہ ’میرے آباؤ اجداد افغانستان سے ہیں لیکن میں خود ایک بھارتی شہری ہوں۔‘

واضح رہے کہ بھارتی یومِ آزادی کے موقع پر عرشی خان نے اپنے انسٹاگرام اکاؤنٹ پر اپنی ایک ویڈیو شیئر کی تھی جس میں اُنہوں نے شاعرِ مشرق علامہ اقبال کی مشہور نظم ’لب پہ آتی ہے دُعا‘ پڑھ کر بھارتیوں کو یومِ آزادی کی مبارکباد دی تھی۔