فرمان الہی
نماز کے اوقات
پاکستان شوبز انڈسٹری کی معروف اداکارہ حبا بخاری نے بھی محسنِ پاکستان ڈاکٹر عبدالقدیر خان کے انتقال پر افسوس کا اظہار کرتے ہوئے کہا ہے کہ عمر شریف کے بعد ہم نے ایک اور قیمتی انسان کو کھو دیا۔
حبا بخاری نے فوٹو اینڈ ویڈیو شیئرنگ ایپ انسٹاگرام پر ڈاکٹر عبدالقدیر خان کی ایک یادگار تصویر شیئر کرتے ہوئے ان کے انتقال پر افسوس کا اظہار کیا ہے۔
انہوں نے اپنی پوسٹ کے کیپشن میں لکھا کہ ’عمر شریف کے بعد ہم نے ایک اور قیمتی انسان کھو دیا ہے۔ ‘
اداکارہ نے مزید لکھا کہ ’پاکستان کی ایٹمی ٹیکنالوجی کے باپ ڈاکٹر عبدالقدیر خان 85 سال کی عمر میں اسلام آباد میں انتقال کر گئے۔‘
انہوں نے محسنِ پاکستان کے لیے دعائے مغفرت کرتے ہوئے لکھا کہ’اللّہ سر قدیر خان کو جنت میں اعلیٰ مقام عطا فرمائے۔ ‘
حبا بخاری نے مداحوں سے اپیل کرتے ہوئے لکھا کہ ’براہ کرم! مرحوم کی روح کے لیے دُعا کریں۔‘
واضح رہے کہ محسنِ پاکستان، ایٹمی سائنسدان ڈاکٹر عبد القدیر خان آج صبح رضائے الٰہی سے انتقال کر گئے۔
ذرائع نے بتایا ہے کہ طبیعت بہت زیادہ خراب ہونے کی وجہ سے ڈاکٹر عبدالقدیر خان کو صبح 6 بجے کے آر ایل اسپتال لایا گیا تھا۔
اسپتال ذرائع کے مطابق ڈاکٹر عبدالقدیر خان کا انتقال صبح 7 بج کر 4 منٹ پر ہوا، ان کی کچھ عرصے سے طبیعت ناساز تھی۔
اسپتال ذرائع نے بتایا ہے کہ ڈاکٹر عبدالقدیر خان کچھ عرصے قبل کورونا وائرس سے متاثر ہوئے تھے۔
ڈاکٹر عبدالقدیر خان 1936ء میں بھوپال میں پیدا ہوئے، وہ اہلِ خانہ کے ہمراہ 1947ء میں ہجرت کر کے پاکستان آئے۔
ڈاکٹر عبدالقدیر نے انجینئرنگ کی ڈگری 1967ء میں نیدر لینڈز کی ایک یونی ورسٹی سے حاصل کی، انہوں نے بیلجیئم کی ایک یونی ورسٹی سے میٹلرجیکل انجینئرنگ میں ڈاکٹریٹ کی ڈگری لی۔
ڈاکٹر عبدالقدیر خان نے بعد میں ایمسٹرڈیم میں فزیکل ڈائنا مکس ریسرچ لیبارٹری جوائن کی۔
مرحوم ڈاکٹر عبدالقدیر خان نے پسماندگان میں بیوہ اور 2 بیٹیاں چھوڑی ہیں۔
