کراچی (نیوز ڈیسک) پیپلز پارٹی کے رکن قومی اسمبلی عبدالقادرمندو خیل حکمران اتحادی جماعت ن لیگ پر برس پڑے۔ اپنے بیان میں انہوں نے کہا کہ وزارت داخلہ اور خزانہ نہیں چل رہیں تو کسی اور پارٹی کو دے دیں، رانا ثنا نے عمران خان کے معاملے کو مس ہینڈل کیا ، پولیس والے کو وارنٹ پکڑا کر اتنی تاخیر کی گئی کہ پورے پاکستان سے پی ٹی آئی کے ورکرز آگئے۔انہوں نے کہا کہ اس معاملے میں رانا ثنا اللہ اور آئی جی پنجاب کو بھی سزا ملنی چاہیے۔وزیر خزانہ سے متعلق گفتگو کرتے ہوئے عبدالقادر مندوخیل نے کہا کہ اسحاق ڈار نے ایٹمی اثاثوں کی بات کیسے کی؟ کسی نے کہا ہے تو نام بتائيں، عمران خان کی طرح سائفر نہ بنائيں، بطور وزیرِ خزانہ اتنی غلط گفتگو کیسے کرلیتے ہیں؟۔عبدالقادر مندو خیل نے مریم نواز پر بھی تير چلا دیے، بولے مریم نواز اگر یہ کہیں کہ یہ ان کی حکومت نہیں تو اس بیان سےعوام بے وقوف نہيں بن سکتے۔