پشاور (لیڈی رپورٹر)ایک سماجی تنظیم کے زیر اہتمام کمونیٹز میں امن کے قیام میں خواتین کے کردار پر صوبائی کنونشن کا اہتمام کیا گیا۔ تنظیم کی ایگزیکٹو ڈائریکٹر مسرت قدیم نے کنونشن کے اغراض مقاصد بتاتے ہوئے کہا کہ امن سے جئے پروگرام کے تحت خواتین سماجی ومعاشی طور با اختیار بنایا جا رہا ہے تاکہ وہ سماجی ہم آہنگی کے قیام میں اپنا کردار ادا کرسکیں پروگرام کے تحت ہزاروں خواتین قائدانہ صلاحیتوں سے مالا مال کیا گیا ہے جو اب معاشرے میں برداشت، مذہبی ہم آہنگی اور مختلف کمیونٹیز کو قریب لانے کے لئے کام کر رہی ہیں۔ دیگر مقررین نے کہا کہ امن اور سیکورٹی میں خواتین کی آواز ہونی چاہئے تاکہ وہ فیصلہ سازی میں کردار ادا کرسکے۔ ایک کاروباری خاتون زارا نے اپنے تجربات بیان کئے۔ بشریٰ حیدر نے کہا کہ ماں اور استاد کی حیثیت سے خواتین نئی نسل کو اقدار منتقل کرتی ہیں خواتین امن کے قیام اور تشدد کے خاتمے میں نمایاں حیثیت اور کردار کی حامل ہیں۔ شاہین نے کہا کہ خواتین ثقافت کی محافظ ہیں خیبر پختونخوا میں انہوں نے کمیونٹیز کو قریب لانے میں اہم کردار ادا کیا ہے خواتین کمیونٹیز کے امن اور تحفظ میں کردار ادا کر رہی ہیں لیکن انہیں وہ مطلوبہ توجہ نہیں دی جارہی ہے۔ ضرورت اس امر کی ہے کہ مناسب سطح پر خواتین کی شرکت کو یقینی بنایا جائے۔ کنونشن میں کہا گیا کہ وقت آگیا ہے کہ خواتین کے کردار کو تسلیم کیا جائے۔