لاہور (کر ائم رپو رٹرسے)انسپکٹر جنرل پولیس پنجاب ڈاکٹر عثمان انور نے کہا ہے کہ بہادری، رسپانس، اونر شپ، ٹیم ورک اور جدوجہد سندھ پولیس کا طرہ امتیاز ہیں۔ان خیالات کا اظہار انہوں نے گز شتہ روز سنٹرل پولیس آفس کے مطالعاتی دورے پر آئے سندھ پولیس کے زیر تربیت ڈپٹی سپرنٹنڈنٹس سے ملاقات کے دوران خطاب کرتے ہوئے کیا۔ ڈی آئی جی نعمان صدیقی کی قیادت میں 3 خواتین سمیت 33 افسران وفد میں شامل تھے۔ آئی جی پنجاب نے زیر تربیت افسران سے گفتگو کرتے ہوئے کہا کہ پنجاب پولیس نے کچہ کے پرخطر علاقوں سے ڈاکوؤں، منظم گینگز کا صفایا کرکے نمایاں کامیابیاں حاصل کی ہیں۔ پنجاب پولیس ملازمین کے سپیشل بچوں کے بہترین علاج معالجے کیلئے " میرا پھول" پروگرام کامیابی سے جاری ہے جبکہ سپاہ کی ہیلتھ سکریننگ کے بعد ویکسینیشن کے پراجیکٹس تیزی سے مکمل کئے جارہے ہیں۔ ڈاکٹر عثمان انور نے وفد کو انسداد جرائم کیلئے پنجاب پولیس کے زیر استعمال جدید آئی ٹی ایپلی کیشنز اور ورکنگ سسٹم بارے آگاہ کیا ۔ آئی جی پنجاب اور وفد کی سربراہ کے درمیان یادگاری سووینئر کا تبادلہ ہوا۔ ایڈیشنل آئی جی طارق رستم چوہان، ڈی آئی جیز وقاص نذیر، محبوب اسلم للہ، ڈاکٹر انعام وحید، ہیڈ کوارٹرز ہمایوں بشیر تارڑ اور اے آئی جی ٹریننگ فیصل مختار بھی اس موقع پر موجود تھے۔