• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

قومی بچت کو فراڈ متاثرہ خاتون کو 12لاکھ روپے بمع منافع لوٹانے کی ہدایت

میرا شہر
اسلام آباد
03 اکتوبر ، 2023
ااسلام آباد ( نمائندہ خصوصی) صدر مملکت ڈاکٹر عارف علوی نے قومی بچت کو فراڈ متاثرہ خاتون کو 12 لاکھ روپے بمع منافع لوٹانے کی ہدایت کرتے ہوئے وفاقی محتسب کے فیصلے کے خلاف مرکزی قومی بچت ڈائریکٹوریٹ کی اپیل مسترد کر دی۔صدر نے فیصلے میں کہا کہ مرکزی قومی بچت ڈائریکٹوریٹ معاملے کی مناسب تحقیقات کیلئے کیس ایف آئی اے کو بھیجے اور انکوائری کے بعد فراڈ کے معاملے میں ملوث اہلکاروں کو سزا دی جائے۔ عابدہ رفعت (شکایت کنندہ) نے وفاقی محتسب کو شکایت کی تھی  کہ ان کا قومی بچت راولپنڈی میں پنشنرز بینیفٹ اکاؤنٹ تھا، 2021 میں پتہ چلا کہ 2019 میں ان کے اکاؤنٹ سے 12 لاکھ روپے فراڈ سے نکالے گئے، رقم چیک بک کے ذریعے نکالی گئی جو خاتون کو کبھی جاری ہی نہیں کی گئی تھی۔خاتون نے قومی بچت کو شکایت درج کرائی، معاملے کی صحیح چھان بین نہیں کی گئی اور خاتون کو کہا گیا کہ وہ کوئی ثبوت پیش نہیں کر سکی۔ خاتون نے وفاقی محتسب سے رابطہ کیا جس نے قومی بچت کو معاملہ ایف آئی اے کو بھیجنے کو کہا۔قومی بچت نے معاملہ ایف آئی اے بھیجنے کی بجائے صدر مملکت کو اپیل دائر کر دی۔ صدر مملکت نے وفاقی محتسب کے فیصلے کے خلاف مرکزی قومی بچت ڈائریکٹوریٹ کی اپیل مسترد کر دی اور خاتون کو رقم لوٹانے کا حکم بھی دے دیا۔
اسلام آباد سے مزید