کراچی ( اسٹاف رپورٹر) گورنر سندھ کامران ٹیسوری نے کہا ہے کہ ملک میں ایس آئی ایف سی کے ثمرات جلد برآمد ہوں گے،معاشی، صنعتی اور اقتصادی ترقی میں صنعت کاروں اور تاجروں کا کلیدی کردار ہے، موجودہ حکومت صنعتی فعالیت کے لئے ہر ممکن تعاون جاری رکھے گی، گورنر ہاؤس کے دروازے آپ لوگوں کیلئے ہمیشہ کھلے ہیں۔ان خیالات کا اظہار انہوں نے گورنر ہاؤس میں ایف پی سی سی آئی کے 16 رکنی وفد سے ملاقات میں کیا، وفد کی قیادت ایف پی سی سی آئی کے صدر عاطف اکرام نے کی ،جبکہ وفد میں سینئر نائب صدر ثاقب فیاض مگوں، آصف سخی، محمد امان پراچہ، آصف انعام، خالد تواب، حنیف گوہر، شوکت احمد، عرفان سروانا، ودیگر شامل تھے۔ملاقات کے دوران بجلی کی قیمتوں میں اضافے، معاشی، اقتصادی اور تجارتی سرگرمیاں بڑھانے، سرمایہ کاری کے مواقع اور اہمیت کے حامل دیگر امور پر بات چیت ہوئی، شہر قائد میں صنعتوں کو بجلی و گیس کی تواتر سے فراہمی پر بھی تبادلہ خیال کیا گیا۔