فرمان الہی
نماز کے اوقات
کراچی (ٹی وی رپورٹ) فیروز آباد کے علاقے پاکستان ایمپلائز کوآپریٹو ہاؤسنگ سوسائٹی میں کشمیر روڈ پر ڈکیتی کے دوران مزاحمت کرنے پر نئے شادی شدہ نوجوان شاہ زیب کو قتل کرنے والے مبینہ ملزم نے گرفتاری سے قبل خود کشی کرلی۔ سینئر سپریٹنڈنٹ پولیس ایسٹ قمر رضا جسکانی کے مطابق شاہ زیب قتل کیس میں ایک مشتبہ ملزم علی فرزند جعفری کی گرفتاری کے لئے اسپیشل انویسٹی گیشن یونٹ کی پولیس پارٹی نے گلشن اقبال بلاک 7 میں ایک ریسٹورنٹ پر چھاپہ مارا۔ انہوں نے بتایا کہ چھاپے کے دوران پولیس کو دیکھ کر ملزم نے اچانک اپنا پستول نکال کر کنپٹی پر خود کو گولی مار لی۔ متوفی شعبہ انوسٹی گیشن پولیس کا سپاہی تھا جو ویسٹ میں تعینات تھا۔ پولیس کے مطابق خود کو قتل کرنے والا والے پولیس اہلکار کو سی سی ٹی وی کی مدد سے شناخت کیا گیا تھا۔ پولیس کے مطابق ملزم کی مختلف زاویوں کی دیگر کیمروں سے بھی سی سی ٹی وی فوٹیج حاصل کی گئی تھی۔ جدید ٹیکنالوجی کی مدد سے ملزم کی گلشن اقبال میں موجودگی کی اطلاع پر چھاپہ مارا گیا تھا۔
