فرمان الہی
نماز کے اوقات
برسلز( حافظ اُنیب راشد ) یورپین یونین نے رینا کیونکا کو پاکستان میں ای یو ڈیلیگیشن کا سربراہ مقرر کردیا ہے۔وہ اس وقت جنوبی افریقہ میں یورپین یونین کے وفد کی سربراہ ہیں۔ اس سے قبل وہ یورپین کونسل کے سابق صدر ڈونلڈ ٹسک کی خارجہ پالیسی کی مشیر رہ چکی ہیں۔یورپین ایکسٹرنل ایکشن سروس کے اس حوالے سے جاری کردہ اعلامیے کے مطابق ان کے تقرر کی منظوری یورپین خارجہ امور کے سربراہ جوزپ بوریل نے دی ۔پاکستان کیلئے مقرر کردہ یورپین سفیر کا پورا نام رینا رتھ کیونکا ہے۔اسٹونین نژاد مادام رینا رتھ کیونکا 1960 میں امریکہ میں پیدا ہوئیں۔مختلف مراحل کی تعلیم کے بعد 1993 میں انہوں نے اسٹونیا کی وزارت خارجہ میں شمولیت اختیار کی ۔ بعد ازاں 2005 میں انہوں نے کونسل آف دی یورپین یونین میں ملازمت شروع کردی۔2007 میں وہ ہاوئیر سولانہ کی انسانی حقوق کیلئے خصوصی نمائندہ بنیں اور 2014 میں انہیں سابق کونسل صدرڈونلڈ ٹسک کا خارجہ پالیسی کیلئے مشیر مقرر کیا گیا۔وہ 1986 میں کچھ عرصہ ʼریڈیو فری یورپʼ کے ساتھ بطور انٹرن بھی منسلک رہ چکی ہیں۔
