انگلینڈ کرکٹ ٹیم کا دورہ پاکستان، کھلاڑیوں کی اکثریت پاکستانی میدانوں سے آشنا

برمنگھم (عمران منور) انگلینڈ کی کرکٹ ٹیم سات میچوں کی ٹی 20سیریز کھیلنے کے لیے تاریخی دورے پر پاکستان پہنچ چکی ہے۔ 17برسوں میں انگلینڈ کا یہ پہلا دورہ پاکستان ہے- آخری بار انگلینڈ نے 2005میں پاکستان کا دورہ کیا تھا۔ 20رکنی اسکواڈ کی قیادت جوس بٹلر کر رہے ہیں جبکہ معین علی نائب کپتان کے طور پران کی معاونت کریں گے۔ دورہ پاکستان کے لیے انگلش اسکواڈ میں اب تک ٹیسٹ نہ کھیلنے والے پانچ کھلاڑیوں کو بھی شامل کیا گیا ہے جن میں بیٹسمین جارڈن کاکس اور ول جیکس کے ساتھ سیمرز ٹام ہیلم، اولی اسٹون اور لیوک ووڈ شامل ہیں۔ اگرچہ انگلش اسکواڈ میں کپتان جوس بٹلر سمیت کئی کھلاڑیوں کے لیے یہ ان کا پہلا دورہ پاکستان ہوگا، تاہم دلچسپ بات یہ ہے کہ اسکواڈ کے 20میں سے 11کھلاڑی اس سے قبل پاکستان میں کھیل چکے ہیں۔ یہ پاکستان سپر لیگ کی بدولت ہے، جو پاکستان کی پریمیئر T20کرکٹ لیگ ہے، اور اس وقت دنیا کی ٹاپ لیگز میں سے ایک ہے۔ گزشتہ چند سیزن میں انگلش کھلاڑیوں کی ایک ریکارڈ تعداد نے مختلف فرنچائزز کے لیے پی ایس ایل میں حصہ لیا، خاص طور پر حالیہ سیزن میں 27انگلش کھلاڑی پی ایس ایل میں شامل ہوئے۔ شاندار بلے باز ڈیوڈ میلن اور فل سالٹ دراصل ان انگلش کھلاڑیوں میں شامل ہیں جنہوں نے انگلینڈ کیلئے بین الاقوامی ڈیبیو کرنے سے قبل پی ایس ایل کے کئی سیزن میں اپنی پرفارمنس کا مظاہرہ کیا۔ میلن جو فی الحال یارکشائر کے لیے کھیلتے ہیں، پہلی بار 2016میں پی ایس ایل کے افتتاحی ایڈیشن میں نظر آئے۔ میلن اگلے سیزن میں بھی زلمی اسکواڈ کے ساتھ رہے، جب ٹیم نے پہلی بار ٹورنامنٹ جیتا تھا۔ اسی سال کے آخر میں، میلن نے انگلینڈ کے لیے اپنا بین الاقوامی ٹی ٹوئنٹی ڈیبیو کیا، جس کے بعد ان کا ٹیسٹ ڈیبیو ہوا۔ میلن کو پشاور زلمی نے پی ایس ایل کے 2019ایڈیشن کے لیے دوبارہ منتخب کیا۔ آخری بار وہ 2020 میں اسلام آباد یونائیٹڈ کے لیے پی ایس ایل میں شامل ہوئے تھے۔انکشائر کے فل سالٹ نے پہلی بار 2018میں پی ایس ایل کھیلی جب انھیں لاہور قلندرز نے چن لیا تھا۔ سالٹ بعد میں 2021 میں پاکستان کے خلاف ون ڈے ڈیبیو کرنے سے پہلے اگلے چند سیزن میں اسلام آباد یونائیٹڈ کے لیے کھیلے۔ 2022میں، انگلینڈ کے لیے بین الاقوامی ٹی 20 ڈیبیو کرنے کے بعد، وہ لاہور قلندرز میں واپس آئے۔ اس بار لاہور قلندرز نے پی ایس ایل کا ساتواں ایڈیشن جیت کر چیمپئن بن کر ٹورنامنٹ کا خاتمہ کیا۔ اوپنر ایلکس ہیلز اور آل راؤنڈر لیام ڈاسن کئی بار پی ایس ایل میں مختلف فرنچائزز کی نمائندگی کر چکے ہیں۔ ناٹنگھم شائر کے ہیلز، درحقیقت، پچھلے کچھ سالوں سے پی ایس ایل کے ایڈیشنز کا باقاعدہ حصہ رہے ہیں۔ شاندار اوپننگ بلے باز، جو 2019 میں آخری بار انٹرنیشنل میچ کھیلنے کے بعد انگلینڈ کی قومی ٹیم میں واپسی کر رہے ہیں، پی ایس ایل کے 2018 اور 2019 کے ایڈیشنز میں اسلام آباد یونائیٹڈ کے لیے کھیل چکے ہیں ۔ وہ پی ایس ایل 5 میں کراچی کنگز کے لیے بھی کھیلے۔ ہیلز 2021 میں اسلام آباد یونائیٹڈ اسکواڈ میں واپس آئے اور پی ایس ایل 7 میں یونائیٹڈ کے لیے بھی نمایاں رہے۔ ہیمپشائر کے لیام ڈاسن اس سے قبل بھی کئی بار پاکستان آ چکے ہیں۔ آل راؤنڈرلیام، انگلینڈ کے ون ڈے ورلڈ کپ جیتنے والے اسکواڈ کا حصہ، پہلی بار 2018میں پی ایس ایل میں شامل ہوئے اور 2019اور 2020 کے سیزن میں بھی زلمی کے ساتھ رہے۔ 2022 میں، وہ پی ایس ایل 7میں اسلام آباد یونائیٹڈ کے لیے نمایاں ہوئے۔ انگلینڈ ٹیم کے نائب کپتان معین علی بھی اس سے قبل پاکستان میں کھیل چکے ہیں۔ برمنگھم میں پیدا ہونے والے معین، جو پاکستانی ورثے سے تعلق رکھتے ہیں، پی ایس ایل کے 2020ایڈیشن میں ملتان سلطانز اسکواڈ کا حصہ تھے۔ پاکستان روانگی سے قبل جیو نیوز کو خصوصی انٹرویو دیتے ہوئے معین نے کہا کہ انہیں ملتان کرکٹ سٹیڈیم میں کھیل کر بہت اچھا لگا۔ میں نے ملتان میں اپنا وقت بہت اچھا گزارا حالانکہ میں پہلے کبھی ملتان نہیں گیا تھا۔ یہ نہ صرف ایک اچھی وکٹ ہے بلکہ ایک شاندار ہوم کراؤڈ بھی ہے۔ انگلش آل راؤنڈر نے کہا کہ میں جتنے بھی گراؤنڈزپر کھیلا وہ اچھے ہیں لیکن ملتان میں واقعی بہت مزہ آیا۔ دیگر انگلش کھلاڑی جنہوں نے پی ایس ایل کے مختلف سیزن میں حصہ لیا ہے ان میں ہیری بروک، لیوک ووڈ، ڈیوڈ ولی، ول جیکس، ریس ٹوپلے اور بین ڈکٹ ہیں۔ یارکشائر کے ہیری بروک اس سال کے شروع میں لاہور قلندرز کے لیے پی ایس ایل 7 میں شامل تھے۔ بروک نے ٹورنامنٹ میں اسلام آباد یونائیٹڈ کے خلاف شاندار سنچری اسکور کی، جو ان کی ٹی ٹوئنٹی کرکٹ میں پہلی سنچری ہے۔انہوں نے ملتان سلطانز کے خلاف فائنل میں بھی اہم اننگز کھیلی، 22 گیندوں میں 41رنز بنائے، جس کی وجہ سے لاہور قلندرز کو پہلی بار پی ایس ایل کا چیمپئن بننے میں مدد ملی۔ ناٹنگھم شائر کے بین ڈکٹ دو بار پی ایس ایل میں شامل ہو چکے ہیں۔ بائیں ہاتھ سے کھیلنے والے ڈکٹ نے پہلی بار 2017میں اسلام آباد یونائیٹڈ کے لیے پی ایس ایل میں کھیلا۔ ڈکٹ پی ایس ایل کے 2022ایڈیشن میں واپس آئے اور کوئٹہ گلیڈی ایٹرز کے لیے کھیلے لیکن تھکاوٹ کی وجہ سے ٹورنامنٹ درمیان ہی میں چھوڑ دیا۔ سرے کے ول جیکس بھی پہلی بار پی ایس ایل 2022 میں شامل ہوئے۔ آل راؤنڈر جیکس نے ٹورنامنٹ میں آدھے راستے پر متبادل کے طور پر اسلام آباد یونائیٹڈ اسکواڈ میں شمولیت اختیار کی۔ لنکا شائر کے لیوک ووڈ ایک اور کھلاڑی ہیں جو پہلی بار اس سال کے پی ایس ایل میں شامل ہوئے۔ ووڈ، جنہیں کوئٹہ گلیڈی ایٹرز نے منتخب کیا تھا، صرف ایک گیم کھیلنے کے بعد انجری کے باعث ٹورنامنٹ سے دستبردار ہو گئے تھے۔ وہ اس سال کے شروع میں پی ایس ایل کھیل چکے ہیں۔ بائیں ہاتھ کے تیز گیند باز نے پی ایس ایل 7میں اسلام آباد یونائیٹڈ کی نمائندگی کی۔ یارکشائر کے ڈیوڈ ولی نے اس سال بھی پی ایس ایل کھیلنے کے لیے پاکستان کا دورہ کیا ۔ سابق انگلش انٹرنیشنل امپائر پیٹر ولی کے بیٹے، سیمر ولی ملتان سلطانز کے لیے کھیلے اور لگاتار دوسرے سال پی ایس ایل کے فائنل میں جگہ بنائی ۔ جمعرات کو کراچی پہنچنے کے فوراً بعد انگلش کپتان جوس بٹلر نے پریس کانفرنس سے خطاب کیا۔ بٹلر نے کہا کہ پی ایس ایل میں کھیلنے والے بہت سے کھلاڑیوں کو حاصل ہونے والا تجربہ انگلش ٹیم کے لیے مددگار ثابت ہوگا۔ طویل عرصے کے بعد انگلینڈ میں واپس آنا بہت اچھا ہے۔ بٹلر نے کہا کہ ہمارے بہت سے کھلاڑی پی ایس ایل میں کھیل چکے ہیں اور یہاں آنے کے مثبت تجربات رکھتے ہیں اور اس سے بھی بڑھ کر، یہاں کے عوام کرکٹ کو کتنا پسند کرتے ہیں۔ کراچی کے نیشنل اسٹیڈیم میں سات میچوں کی ٹی20 سیریز کا پہلا میچ منگل 20ستمبر کو ہونا ہے۔