امریکا IMF کو ہم سے نرم رویہ رکھنے پر قائل کرنے کیلئے سفارتی اثر رسوخ استعمال کرے، پاکستان

اسلام آباد (مہتاب حیدر) آئی ایم ایف کی جانب سے فنڈ پروگرام کی بحالی کے لیے سخت شرائط کے درمیان پاکستان نے امریکی حکام سے کہا ہے کہ وہ اپنا سفارتی اثرورسوخ استعمال کرتے ہوئے آئی ایم ایف کو اسلام آباد کے ساتھ نرم رویہ دکھانے پر قائل کرے۔ یہ درخواست پاکستان کے وزیر خزانہ اسحاق ڈار نے دورہ پر آئے ہوئے امریکی محکمہ خزانہ کے ڈپٹی اسسٹنٹ سیکرٹری برائے ایشیا رابرٹ کپروتھ سے ملاقات کے دوران کی جنہوں نے بدھ کو فنانس ڈویژن میں ان سے ملاقات کی۔ تاہم ذرائع نے بتایا کہ پاکستان اور آئی ایم ایف نے اس ہفتے ڈیٹا کا تبادلہ جاری رکھا لیکن اب تک فنڈ نے اپنی سخت شرائط میں نرمی کے لیے کوئی نرم رویہ نہیں دکھایا۔ تنازعات کی ایک وجہ شرح مبادلہ سے نمٹنے کے طریقہ کار پر مستقل اختلافات ہیں کیونکہ آئی ایم ایف اسے مصنوعی طور پر مستحکم شرح مبادلہ کو برقرار رکھنے کے لیے مکمل طور پر ناقابل قبول سمجھتا ہے۔ اگرچہ وزیر اعظم شہباز شریف نے عوامی طور پر اعلان کیا تھا کہ حکومت فنڈ پروگرام کی بحالی کے لیے آئی ایم ایف کی تمام شرائط پر عمل درآمد کے لیے تیار ہے۔ لیکن حکومت کو اپنی سیاسی مجبوریوں کے تحفظ کی خاطر سخت شرائط پر عمل درآمد کرنا مشکل ہو رہا ہے۔ فنانس ڈویژن کے ایک سینئر عہدیدار نے رابطہ کرنے پر بتایا کہ بات چیت مثبت انداز میں جاری رہی۔ سرکاری اعلان کے مطابق پاکستان کے محکمہ خزانہ کی سینئر میکرو اکانومسٹ ایوا گھرمائی، فنانشل اتاشی لاریٹا بولڈن، وزیر مملکت برائے خزانہ و محصولات ڈاکٹر عائشہ غوث پاشا، ایس اے پی ایم برائے خزانہ طارق باجوہ، سیکرٹری خزانہ اور فنانس ڈویژن کے سینئر افسران نے اجلاس میں شرکت کی۔ وزیر خزانہ سینیٹر محمد اسحاق ڈار نے رابرٹ کپروتھ کا خیرمقدم کیا اور ملک کی معاشی صورتحال کے بارے میں آگاہ کیا۔ انہوں نے بتایا کہ موجودہ حکومت کو کمزور معیشت ورثے میں ملی ہے اور کہا کہ مشکل معاشی حالات کے باوجود حکومت چیزوں کو درست سمت میں طے کرنے اور توانائی کے شعبے اور کیپٹل مارکیٹ سمیت تمام شعبوں میں اصلاحات متعارف کرانے پر توجہ دے رہی ہے تاکہ معاشی ترقی اور ترقی حاصل کی جا سکے۔ انہوں نے کہا کہ حکومت کے عملی اقدامات کی بدولت ملک ترقی وخوشحالی کی منازل طے کر رہا ہے۔ وزیر خزانہ نے رابرٹ کپروتھ کے ساتھ پاکستان میں سیلاب سے ہونے والے نقصانات اور پاکستان کی معیشت پر پڑنے والے اثرات سے بھی آگاہ کیا۔ انہوں نے زور دے کر کہا کہ حکومت تمام چیلنجز سے پورے عزم کے ساتھ نمٹ رہی ہے۔ رابرٹ کپروتھ نے اپنی جانب سے پاکستان اور امریکہ کے درمیان اچھے تعلقات پر زور دیا۔ انہوں نے معاشی اور مالی استحکام کے لیے حکومت کی پالیسیوں اور پروگراموں پر مزید اعتماد کا اظہار کیا۔ انہوں نے اقتصادی اور مالیاتی امور پر اپنی حمایت اور تعاون کو مزید بڑھایا۔ وزیر خزانہ نے حمایت اور تعاون پر رابرٹ کپروتھ کا شکریہ ادا کیا۔