علالت نے پرویز مشرف کو پاکستانی پاسپورٹ کی تجدید کرانے کی بھی مہلت نہ دی

کراچی( افضل ندیم ڈوگر) سابق صدر پاکستان جنرل ریٹائرڈ پرویز مشرف کی شدید علالت کے دوران ان کے پاکستانی پاسپورٹ کی مدت ختم ہوگئی تھی اور وہ پاکستانی پاسپورٹ کی تجدید نہ کراسکے۔ سابق صدر پاکستان پرویز مشرف کے پاسپورٹ میں لفظ جنرل بھی نام کا حصہ ہے۔ سابق صدر جنرل پرویز مشرف نے دبئی میں پاکستانی سفارتخانے سے 5 جنوری 2018 کو پاکستانی پاسپورٹ کی تجدید کرائی تھی۔ ان کا پاسپورٹ نمبر AJ0848365 رواں سال پانچ جنوری کو زائدالمعیاد ہوگیا تھا اور اس دوران وہ دبئی کے امریکن اسپتال میں شدید علالت میں زیر علاج تھے اور بیماری کے باعث جنرل پرویز مشرف کے جاری آخری پاسپورٹ کی تجدید نہ ہوسکی۔ سابق صدر کا جسد خاکی اسی پاسپورٹ کے ساتھ تدفین کیلئے کراچی پہنچایا گیا۔ قوانین کے مطابق اسی پاسپورٹ کے ساتھ موجود ڈیتھ سرٹیفکیٹ پر امیگریشن کارروائی مکمل کی گئی تھی۔