یوم پاکستان پر جوش و جذبہ، سول اعزازات کی تقریب، خرابی موسم، فوجی پریڈ ہفتے تک ملتوی

اسلام آباد (نیوز ایجنسیاں )23 مارچ قراردادِ پاکستان پیش کیے جانے کے 83 سال مکمل ہونے پر ملک بھر میں ترقی، خوشحالی اور ملک کے مضبوط دفاع کو یقینی بنانے کے عزم کے ساتھ یوم پاکستان بھرپور ملی جوش و جذبے کے ساتھ منایا گیا تاہم ایوانِ صدر میں ہونے والی روایتی فوجی پریڈ اسلام آباد میں خراب موسم کے باعث ملتوی کر دی گئی ، مزار اقبال پر گارڈز تبدیلی کی پروقار تقریب کا انعقاد ،یومِ پاکستان کی ملتوی ہونے والی پریڈ اب25 مارچ کو ایوان صدر میں منعقد ہوگی،اسلام آباد میں دن کا آغاز 31 ، صوبائی دارالحکومتوں میں 21,21توپوں کی سلامی سے ہوا، ملکی سلامتی اور استحکام کیلئے خصوصی دْعائیں۔ جمعرات کو وفاقی دارالحکومت اسلام آباد میں دن کا آغاز 31 توپوں اور چاروں صوبائی دارالحکومتوں کراچی، لاہور، پشاور اور کوئٹہ میں میں 21 توپوں کی سلامی سے ہوا ، نماز فجر کے اجتماعات میں ملک و ملت کی سلامتی اور استحکام کے لیے خصوصی دْعائیں مانگی گئیں۔ تاہم وفاقی دارالحکومت اسلام آباد میں خراب موسم کے باعث ایوانِ صدر میں ہونے والی یومِ پاکستان کی پریڈ ملتوی کردی گئی۔ ایوانِ صدر کے مطابق یومِ پاکستان کی ملتوی ہونے والی پریڈ اب25 مارچ کو ہوگی۔