یوگا کچھ چوٹوں کا درد کم کرنے میں مدد کر سکتا ہے

چوٹیں ہمارے روزمرہ کے معمولات اور صحت مند رہنے کے احساس پر بڑا اثر ڈال سکتی ہیں۔ وہ اس تناؤ میں اپنا حصہ ڈال سکتی ہیں جو ہم پہلے ہی محسوس کر رہے ہوتے ہیں اور درد پر قابو پانے کے لیے ہمیں اپنی نقل و حرکت کے انداز اور معمولات کو تبدیل کرنا پڑتا ہے۔ زندگی میں ہم کسی نہ کسی وقت، کسی نہ کسی قسم کی چوٹ لگنے کا تجربہ کرتے ہیں۔ چوٹوں کی اقسام ایتھلیٹک چوٹوں سے لے کر گرنے سے لگنے والی چوٹوں تک، یا سب سے عام کمر کے نچلے حصے کی چوٹ ہو سکتی ہیں۔ کچھ معاملات میں کمر کے نچلے حصے کی چوٹ دائمی درد کا باعث بن سکتی ہے۔

یوگا اور دائمی درد

جب کوئی زخمی ہوتا ہے تو اس کا سارا دھیان درد کو دور کرنے کی کوشش میں لگا ہوتا ہے جبکہ علامات کو نظر انداز کرتا ہے، ساتھ ہی مزید چوٹ لگنے یا درد بڑھنے کے خوف سے وہ ہر طرح کی نقل و حرکت روک دیتا ہے۔ تاہم، ایسے میں یہ جاننا اکثر مشکل ہوتا ہے کہ ان حالات میں کون سے اقدامات اٹھانا بہترین ہے۔ اینالز آف انٹرنل میڈیسن کے جولائی 2017ء کے ایڈیشن میں شائع ہونے والی ایک تحقیق سے پتا چلا ہے کہ یوگا کچھ چوٹوں کے درد کو کم کرنے میں مدد کر سکتا ہے۔ 

بوسٹن میڈیکل سینٹر کے محققین نے پایا کہ یوگا جو خاص طور پر ان لوگوں کی ضروریات کو پورا کرنے کے لیے ڈیزائن کیا گیا ہو جو کمر کے نچلے حصے میں دائمی درد میں مبتلا ہیں، حرکت کو بڑھانے اور درد کی علامات کو نمایاں طور پر کم کرنے میں مدد کرتا ہے۔

چوٹ ٹھیک کرنے والے یوگا کے عناصر

یوگا آگاہی بڑھاتا ہے: یوگا مائنڈفل نیس کے نام سے بھی جانا جاتا ہے، یہ آگاہی ہمیں چوٹ کے ساتھ ہمارے تعلق کو جوڑنے میں مدد دے سکتی ہے۔ ہمارے پاس لاشعوری طور پر حرکت کا ایسا انداز ہو سکتا ہے جو چوٹ میں اضافہ کر رہا ہے۔ ہم کس طرح خود کو حرکت دیتے ہیں اس کے بارے میں اپنی آگاہی کو بڑھانا اس طریقے کو تبدیل کرنے کی جانب پہلا قدم ہو سکتا ہے۔

یوگا پٹھوں کے تناؤ کو آرام دیتا ہے: اگر ہم دائمی طور پر زیادہ کام کرنے والے عضلات، جو چوٹ کی حفاظت کر رہے ہیں، کو آرام دینے اور سافٹ کرنے کی اجازت دیتے ہیں تو ہمیں اس درد کا سامنا کرنے کا امکان کم ہوتا ہے جو چوٹ کے ساتھ ساتھ ہوسکتا ہے۔ اگر ہم حرکت کے دوران مطمئن رہیں تو اس سے مزید چوٹ کو روکنے میں بھی مدد مل سکتی ہے۔

کمر کے نچلے حصے کیلئے یوگا

محققین نے پایا کہ کوبرا پوز، لوکسٹ پوز، ٹوئسٹ اور "نِیز ٹو چیسٹ" جیسی مشقوں سے دائمی درد پر قابو پانے میں مدد ملتی ہے۔ یہ مشقیں کم چکنائی والے پودوں پر مبنی خوراک، ورزش اور گروپ سپورٹ کے ساتھ دل کی بیماری کو روکنے اور قابو پانے کے لیے بھی استعمال کی جاتی ہیں۔ مطالعے سے معلوم ہوا ہے کہ یوگا کی یہ مشقیں کرنے کے بعد لوگوں کی کمردرد کی دائمی علامات میں بہتری آنا شروع ہو جاتی ہے۔

چوٹوں کے ساتھ یوگا کی مشق

چاہے آپ کو کمر کی چوٹ ہو یا کوئی اور چوٹ، صحت کی طرف واپسی کا راستہ تلاش کرنے میں مدد کے لیے یوگا مشق میں ترمیم کرنے کے طریقے موجود ہیں۔

آہستہ چلیں اور کم کام کریں: چوٹ لگنے کی صورت میں یہ ضروری ہے کہ آہستہ آہستہ حرکت کریں اور تھوڑا کم کام کریں جب تک کہ آپ کو حرکت کے ایسے طریقے نہ مل جائیں جو آپ کی حالت کو خراب یا مزید درد پیدا کرنے کا باعث نہ بنیں۔ وقت کے ساتھ، آپ کو وہ طریقے مل جائیں گے جن سے آپ اپنی چوٹوں کے ساتھ (اور ارد گرد) حرکت اور کام کر سکتے ہیں۔

ذہنی تصّور کریں: درحقیقت حرکت کے لیے کسی انداز کو اپنانے سے پہلے، اس کا ذہنی تصّور اپنے دماغ میں کریں۔ اگر آپ ایسا تصّور کرنے سے قاصر ہوں تو پھر ایسا نہ کریں۔ صرف ذہنی تصّور رکاوٹوں کو دور کرنے اور نئے راستے بنانے میں مدد کر سکتا ہے، جو وقت کے ساتھ شفا یابی کے عمل میں معاون ہو سکتے ہیں۔ آپ کو اندرونی مشقوں جیسے سانس لینے، آرام کرنے، ذہنی تصّور اور مراقبہ پر زیادہ توجہ دینے کی ضرورت پڑسکتی ہے جب تک کہ چوٹ والا متاثرہ حصہ ٹھیک نہ ہوجائے۔

سانس کا استعمال کریں: سانسوں کو اپنی رہنمائی کرنے دیں۔ اگر آپ محسوس کرتے ہیں کہ آپ اپنی سانس روک رہے ہیں یا آپ کی سانسیں بے قاعدہ یا کم ہو رہی ہیں تو کم جسمانی حرکت کرنے کی کوشش کریں۔ کسی بھی تناؤ یا درد کو جانے دینے کا تصور کرنے کے لئے سانس چھوڑنے کی مشق کا استعمال کریں۔ متاثرہ جگہ پر توانائی لانے اور شفا یابی کو فروغ دینے کے لیے سانس لینے کی مشق کریں۔

اپنے جسم سے پوچھیں: مشق کے دوران وقت نکال کر اپنے جسم سے جاننے کی کوشش کریں کہ اسے کیا ضرورت ہے اور آپ کو کیا ایڈجسٹمنٹ کرنی چاہیے۔ اس قسم کی ہم آہنگی آپ کے اندرونی علاج کو مضبوط کرنے میں مدد کرتی ہے۔ یہ عمل آپ کی چوٹ کو ٹھیک کرنے میں آپ کی رہنمائی کر سکتا ہے اور آپ کو باخبر رہنے کی اجازت دے سکتا ہے تاکہ چوٹ والے حصے کو دوبارہ نقصان نہ پہنچے۔