عام انتخابات میں مسترد شخص کو مرکزی حکومت کی نگرانی دی گئی ،بی این پی

کوئٹہ (آن لائن)بلوچستان نیشنل پارٹی کی ضلعی کابینہ کے صدر اور ممبر سینٹرل ایگزیکٹیو کمیٹی غلام نبی مری، جنرل سیکرٹری میر جمال لانگو، سینئر نائب صدر ملک محی الدین لہڑی، نائب صدر طاہر شاہوانی ایڈووکیٹ، ڈپٹی جنرل سیکرٹری ڈاکٹر علی احمد قمبرانی، جوائنٹ سیکرٹری اسماعیل کرد، انفارمیشن سیکرٹری نسیم جاوید ہزارہ، فنانس سیکرٹری میر اکرم بنگلزئی، لیبر سیکرٹری ملک عطا اللہ کاکڑ، خواتین سیکرٹری منورہ سلطانہ، کسان ماہیگیر سیکرٹری ملک ابراہیم شاہوانی، ہیومن رائٹس سیکرٹری پرنس رزاق بلوچ اور پروفیشنل سیکرٹری میر مصطفی سمالانی نے مشترکہ بیان میں عبدالرحمن خلجی، عبدالمالک خلجی اور محبوب کو اپنے درجنوں ساتھیوں سمیت بلوچستان نیشنل پارٹی میں شمولیت پر مبارکباد دیتے ہوئے کہا ہے کہ قائد بلوچستان سردار اخترجان مینگل کی دانشمندانہ اور بااصول قیادت پر اعتماد کرتے ہوئے۔ انہوں نے بی این پی کے سیاسی کارواں میں شامل ہونے کا جو فیصلہ کیا ہے وہ قابل داد و تحسین ہے۔انہوں نے کہا کہ ملک میں درپردہ آمریت نافذ ہے۔جس کی واضح مثال وڈھ کی مخدوش صورتحال ہے ۔انہوں نےکہاکہ مرکزی حکومت کی نگرانی ایک ایسے شخص کے ہاتھ میں سونپ دی گئی ہے جس کو عوام نے انتخابات میں رد کر دیا تھا اور جس کی پہچان ہی بلوچ دشمنی ہے۔