فرمان الہی
نماز کے اوقات
کراچی ( اسٹاف رپورٹر) میزبان بھارت نے ورلڈ کپ میں مضبوط حریف آ سٹریلیا کو مشکل حالات سے دوچار ہونے کے باوجود چھ وکٹ سے شکست دے کر اپنی جیت کا کھاتہ کھول لیا۔ صرف 2 رنز پر 3 کھلاڑی آؤٹ ہونے کے بعد ویرات کوہلی اور کے ایل راہول نے گھبراہٹ کا شکار ہوئے بغیر اپنی ٹیم کی لاج رکھ لی۔ کوہلی نے اپنے ورلڈ کلاس بیٹر ہونے کا ثبوت دیا ۔ آسٹریلین فیلڈر مچل مارش کی جانب سے ابتدا ہی میں ویرات کوہلی کا ڈراپ کرنا کینگروز کیلئے سخت نقصان دہ ثابت ہوا۔انہوں نے چوتھی وکٹ پر 165رنز کی فتح گر شراکت قائم کی۔ویرات کوہلی 85 رنز بنا کر جوش ہیزل ووڈ کی گیند پر کیچ آؤٹ ہوگئے۔ اس وقت ہوم سائیڈ کو فتح کیلئے صرف 33 رنز درکار تھے۔ کے ایل راہول نے ناقابل شکست 97 رنز بنائے، 200 اسکور کا ہدف 52 گیندیں قبل 4وکٹوں پر پورا کرکے میچ 6 وکٹوں سے جیت لیاچنئی کے چدم برم اسٹیڈیم میں ورلڈ کپ کے پانچویں میچ میں آسٹریلوی کپتان پیٹ کمنز نے بھارت کے خلاف ٹاس جیت کر پہلے بیٹنگ کرنے کا فیصلہ کیا۔ یہ فیصلہ ان کے گلے پڑگیا، آسٹریلیا کی پوری ٹیم آخری اوور کی تیسری گیند پر 199رنز بنا کر پویلین لوٹ گئی۔ بھارتی کپتان روہت شرما نے6 بولر کوآزمایا اور تمام ہی وکٹ لینے میں کامیاب رہے۔ بھارت کی جانب سے روندرا جدیجا نے 3، کلدیپ یادیو، جسپریت بمراہ نے 2، 2 جبکہ ایشون، محمد سراج اور پانڈیا نے ایک ایک وکٹ حاصل کی۔ میچ کے آغاز پر ہی آسٹریلیا کی پہلی وکٹ 5 رنز پر گر گئی، آسٹریلوی اوپنر مچل مارش بغیر کوئی اسکور بنائے جسپریت بمراہ کی گیند پر آؤٹ ہوئے، آسٹریلیا کی دوسری وکٹ 74 رنز پر گری، ڈیوڈ وارنر 52 گیندوں پر 41رنز بنا کر کلدیپ یادیو کا شکار بنے، اسٹیوا سمتھ بھی بیٹنگ لائن کو مضبوط سہارا نہ دے سکے اور 46رنز بنا کر رویندرا جدیجا کی گیند پربولڈ ہوگئے۔کینگروز کی چوتھی وکٹ 119رنز پر گری، آسٹریلوی بیٹر لبوشین 27رنز بنا کر رویندرا جدیجا کی گیند پر کیچ آؤٹ ہوئے، ایلکس کیری بغیر کھاتے کھولے صفر پر آؤٹ جبکہ گلین میکسویل 15 رنز بنا کر بولڈ ہوگئے۔ کیمرون گرین 8 ، کپتان پیٹ کمنز 15 ، ایڈم زمپا 6، اور مچل اسٹارک 28 رنز بنا کر پویلین لوٹ گئے۔ 200رنز کے ہدف کے سامنے ابتداء میں ہی بھارت کے تین بیٹسمین وکٹ چھوڑ گئے، بھارت کی جانب سے اننگز کا مایوس کن آغاز کیا گیا، بھارت کے پہلے تین کھلاڑی 2 رنز کے مجموعی اسکور پر بغیر کوئی رن اسکور کیے پویلین لوٹ گئے، ایشان کشن ، کپتان روہت شرما اور سری یاس ایئر صفر پر آؤٹ ہوگئے۔ بھارت کی جانب سے ویرات کوہلی اور کےایل راہول نے ذمہ دارانہ بیٹنگ کا مظاہرہ کرتے ہوئے ا سکور کو آگے بڑھایا ، دونوں نے ابتدائی 15 اوورز میں محتاط انداز اپنایا لیکن ٹیم کی نصف سنچری مکمل ہونے کے بعد دونوں کے رنز بنانے کی رفتار میں اضافہ ہوتا چلا گیا اور جلد ہی دونوں نے اپنی اپنی ففٹی مکمل کر لی۔ ٹاپ آرڈرز کے 3 پلیئرز روہت شرما ،ایشان کشن اور سری یاس ایئر تینوں صفر پر آوٹ ہوئے ۔ جوش ہیزل ووڈ نے3 اور مچل سٹارک نے ایک وکٹ لی، راہول کو مین آف دی میچ قرار دیا گیا۔
