• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

کراچی میں اسٹریٹ کرائم پر قابو پولیس کیلئے بڑا چیلنج بن گیا

آج کا اخبار
اہم خبریں
13 اپریل ، 2024
کراچی(آئی این پی)کراچی میں اسٹریٹ کرائم پر قابو پولیس کے لیے بڑا چیلنج بن گیا۔پولیس حکام کے مطابق رمضان المبارک میں ڈکیتی مزاحمت پر 19 افراد قتل اور 55 سے زائد افراد زخمی ہوئے۔ پولیس حکام کا بتانا ہے کہ سال 2024میں ڈکیتی مزاحمت پر59افراد قتل کردیئے گئے جب کہ 200سے زائد زخمی ہوئے۔ پولیس کے مطابق رواں سال اب تک کراچی میں ڈاکو ئوں سے 425مقابلے ہوئے جن میں 55ڈاکو مارے گئے 439زخمی ہوئے۔کراچی میں سپر ہائی وے پر جنجال گوٹھ میں زخمی ڈاکو کو سرعام گولیاں مارنے کی ویڈیو سامنے آنے پر پولیس نے فائرنگ کرنے والے شہری کو گرفتار کرلیا۔ڈی آئی جی ایسٹ اظفر مہسر کے مطابق گزشتہ روز 3ڈاکو نوجوان سے موٹرسائیکل چھین رہے تھے تو مزاحمت پر ڈاکوئوں نے مطیع اللہ نامی نوجوان کو گولی مار کر زخمی کردیا۔ڈاکو فرار ہورہے تھے تو شہریوں نے پکڑنے کی کوشش کی تو ڈاکوئوں نے عوام پر فائرنگ کی جس سے ان کا اپنا ہی ایک ساتھی زخمی ہوگیا اور دو ڈاکو زخمی ساتھی کو چھوڑ کر فرار ہوگئے۔زخمی نوجوان مطیع اللہ کے چچا جاوید کو کسی نے کہا کہ تمہارا بھتیجا ڈاکوئوں نے قتل کردیا ہے تو جاوید نے طیش میں آکر ڈاکو کو گولیاں مار کر ہلاک کردیا۔ویڈیو سامنے آنے کے بعد ڈاکو کو گولیاں مارنے والے جاوید کو گرفتار کرکے مقدمہ درج کرلیا۔
اہم خبریں سے مزید