فرمان الہی
نماز کے اوقات
کراچی(آئی این پی)آئی جی سندھ غلام نبی میمن نے اعتراف کیا ہے کہ اسٹریٹ کرائم میں مزاحمت پر قتل اور زخمی کرنے کے واقعات میں اضافہ ہوا ہے، کراچی میں اسٹریٹ کرائم کی یومیہ 400 اور سالانہ 80 ہزار وارداتیں رپورٹ ہوتی ہیں، اسٹریٹ کرائم ہمارے لئے بڑا چیلنج ہے اور کرمنلز کے خلاف سخت کریک ڈاؤن جاری ہے۔
گزشتہ روز گفتگو کرتے ہوئے آئی جی سندھ نے کہا کہ ڈکیتی کے دوران شہریوں کو قتل اور زخمی کرنے والے ملزمان کو پکڑا گیا ہے جب کہ ڈکیتی کے دوران شہریوں کو قتل کرنے والے 64فیصدکیسزکا سراغ لگالیا ہے، ڈکیتی کے کیسز کی تفتیش کے لیے67تفتیشی افسران مختص کئے ہیں۔
آئی جی سندھ نے مزید کہا کہ عادی ملزمان کی تعداد 8سے 12ہزار کے قریب ہے جن کی ٹیگنگ پر کام کیا جارہا ہے اور پولیس کو اس حوالے سے تربیت بھی دی جارہی ہے، شہر میں موٹرسائیکل چوری کی وارداتیں زیادہ ہیں، کراچی کے 108تھانے ہیں اور ایک تھانے میں ڈھائی لاکھ کی آبادی آتی ہے۔
انہوں نے کہا کہ شہر میں منشیات بھی ایک بڑا مسئلہ ہے، ہم صوبے کے داخلی راستوں پر سختی کررہے ہیں اور کیمرے لگائے جارہے ہیں،کوشش ہے کہ صوبے میں پولیس کارکردگی کو مزید بہتر کیا جائے۔
