دودھ، بیف اور مٹن کی قیمتوں کا مارکیٹ کے مطابق تعین کرنے پر اتفاق

اسلام آباد( رپورٹ ، تنویر ہاشمی ) آئی ایم ایف کے مطالبے پر ملک بھر میں دودھ ، بیف اور مٹن گوشت کی قیمتوں کا مارکیٹ کے مطابق تعین کرنے کے لیے اصولی اتفاق کر لیا گیا ہے.

آئی ایم ایف کامطالبہ، گوشت پروسیسر،کنزیومر ایسوسی ایشنز ودیگر سٹیک ہولڈرز سے مشاورت شروع کرنیکی ہدایت، ذرائع کے مطابق دودھ اور گوشت کی قیمتوں کو ڈی ریگولیٹ کرنے کےلیے وفاقی ، صوبائی حکومتوں اور ڈیری و فارم ایسوسی ایشن کا اجلاس ہوا.

 وفاقی ، صوبائی حکومتوں اور ڈیری و فارمر ایسوسی ایشن نےلائیو سٹاک شعبے کی ترقی کےلیے دودھ ، بیف اور مٹن گوشت کی قیمتوں کو ڈی ریگولیٹ کر نے پر اصولی اتفاق کیا ہے.

 گوشت پروسیس کرنے والوں اور کنزیومر ز ایسوسی ایشن اور متعلقہ سٹیک ہولڈرز سے مشاورت کا عمل جلد شروع کرنے کی ہدایت کی گئی ہے،ذرائع کے مطابق گوشت اور دودھ کے معیار کے پہلوؤں کا احاطہ کرنے کےلیے ریگولیٹری میکنزم مرتب کرنے پر بھی اتفاق ہواہے .

 وزارت نیشنل فوڈ سکیورٹی و ریسرچ کے اینمل ہسبنڈری کمشنرکی صدارت میں دودھ اور گوشت کی قیمتوں کی ڈی کیپنگ اور ڈی ریگولیشن کرنےسے متعلق اعلیٰ سطح اجلاس میں بلوچستان ، سندھ ، پنجاب ، خیبرپختونخوا ، آزاد کشمیر اور گلگت بلتستان سےلائیو سٹاک اور فشریز کےحکام ، وزارت قانون ، وزارت تجارت ، ، وزارت منصوبہ بندی ، وفاقی دارلحکومت اسلام آباد اور ڈیری ، کیٹیل و فارمر ایسوسی ایشن کے نمائندگان شریک ہوئے.

 اجلاس میں بتایا گیا کہ دودھ ، بیف اور مٹن گوشت کی قیمتوں کو ڈی ریگولیٹ کرنےسے متعلق سمری ای سی سی ، وزارت قانون ، وزارت صنعت وپیداواراور وزارت خزانہ کو ارسال کر دی گئی ہے ، قیمتوں کو ڈی ریگولیٹ کرنے اور ڈی کیپنگ کا مقصد لائیو سٹاک شعبے میں سرمایہ کاری کی حوصلہ افزائی ہے ۔