ڈرامہ سیریل ”بے حد“ کی آخری قسط آج ”جیو ٹی وی“ سے نشر کی جائیگی

کراچی (جنگ نیوز) سیونتھ اسکائی انٹرٹینمنٹ کے بینر تلے تخلیق کی گئی ڈرامہ سیریل ”بے حد“ کی آخری قسط جمعرات کو ”جیو ٹی وی“ سے نشر کی جائے گی۔ پہلی ہی قسط سے ناظرین کی توجہ حاصل کرنے والی کہانی میں محبت، ضد، عناد اور خوشیوں کے سنگسار ہونے کے مختلف پہلو دکھائے گئے۔ رخسانہ نگار کے قلم سے لکھی گئی کہانی نے ہر طرف اپنی مقبولیت کی دھاک بٹھائی۔ سیدرامش رضوی کی ہدایات میں یکطرفہ محبت کے جنون نے جس طرح چاہت کا سکون چھینا اس میں عوام کی بڑی تعداد ڈوبی رہی۔ سیریل کی اسٹار کاسٹ میں شامل روبینہ اشرف، شہریار زیدی، ہمایوں اشرف، زینب قیوم، بینش چوہان، کامران جیلانی اور ساتھی فنکاروں کے ہمراہ مدیحہ امام، عفان وحید نے یادگارپرفامنس دی۔ صابر ظفر کے لکھے گئے گیت کو شانی ارشد نے اپنی آواز اور کمپوزیشن کے ساتھ ڈرامہ سیریل کے او ایس ٹی کی صورت خوب پسند کیا۔ ڈرامے کی آخری قسط شب8 بجے ”جیو ٹی وی“ سے نشر ہوگی۔