بانی پی ٹی آئی جیل سے باہر آئے تو ان کی کہانی ختم، فیصل واوڈا

12 ستمبر ، 2024

سینئر سیاسی رہنما سینیٹر فیصل واوڈا نے کہا ہے کہ 21 ستمبر کو جلسہ نہیں ہوگا وہ جلسہ کر ہی نہیں سکتے، گرفتاری پر وزیراعظم، اسپیکر اور آئی جی کو کچھ نہیں پتہ۔

ایک ٹی وی پروگرام میں گفتگو کرتے ہوئے سینیٹر فیصل واوڈا نے کہا کہ بانی پی ٹی آئی جیل سے باہر آئے تو ان کی کہانی ختم، بانی پی ٹی آئی کا جیل میں رہنا ان کے فائدے میں ہے۔

انھوں نے کہا کہ ریٹائرڈ جنرل فیض سارا ملبہ بانی پی ٹی آئی پر ڈالیں گے۔ ابھی بہت کچھ سامنے آنا باقی ہے، مراد سعید وہ توتا ہے جس میں دو بندوں کی جان ہے۔ فیصل واوڈا سوال کیا کہ مراد سعید چھپا ہوا کیوں ہے سامنے کیوں نہیں آتا؟

سینیٹر نے کہا ریٹائرڈ جنرل فیض اور گنڈاپور کی گفتگو سامنے آچکی ہے، گنڈاپور کے خلاف پرچہ ہوچکا ہے، کارروائی ہونی چاہیے۔

فیصل واوڈا نے کہا کہ ہفتہ چار پانچ دن میں باہر سے اچھی خبر آئے گی۔ جیل توڑنے کی بات کرنے والے زندگی کی ضمانت کیسے دیں گے۔

انھوں نے کہا کہ علیمہ خان اپنے بھائی کے ساتھ بہت مخلص ہیں، پی ٹی آئی کے سارے لوگ اپنا چورن بیچ رہے ہیں۔

انکا کہنا تھا کہ علی امین کو گرفتاریوں پر بات کرنا چاہیے تھی۔ بانی پی ٹی آئی کبھی کوئی اور کبھی کوئی بیان دیتے ہیں۔ کبھی گنڈاپور کی بات سے لاعلم اور کبھی حمایت کرتے ہیں۔ پہلے گنڈاپور نے کہا کسی کا باپ بانی پی ٹی آئی کو گرفتار نہیں کرسکتا۔ اب کہہ رہے ہیں کسی کا باپ ملٹری ٹرائل نہیں کرسکتا۔

انہوں نے کہا کہ بھٹو کی پھانسی غلط تھی یہ بتانے میں قانون کو 44 سال لگے۔

قومی خبریں سے مزید