فرمان الہی
نماز کے اوقات
پیرس(رضا چوہدری) وزیراعظم پاکستان شہباز شریف کی ریاض میں فرانسیسی صدرایمانوئل میکرون سے ملاقات ہوئی،اس موقع پر پاک فرانس تعلقات بڑھانے پر اتفاق کیا گیا،شہبازشریف نے پاکستان میں سرمایہ کاری پر زور دیا جب کہ دونوں رہنماؤں نے علاقائی وعالمی مسائل پر قریبی رابطے میں رہنے کاعزم ظاہر کیا۔ تفصیلات کے مطابق وزیراعظم پاکستان شہباز شریف نےبدھ کو ریاض میں ون واٹر سمٹ کے موقع پر فرانس کے صدر ایمانوئل میکرون سے ملاقات کی۔ وزیراعظم نے ریاض میں ون واٹر سمٹ کی فرانس سعودیہ مشترکہ میزبانی پر صدر میکرون کو مبارکباد دی۔ موسمیاتی تبدیلی اور ترقیاتی امور پر فرانس کے قائدانہ کردار کو سراہتے ہوئے وزیراعظم نے 2022 کے تباہ کن سیلاب کے تناظر میں صدر میکرون کی پاکستانی عوام کے لیے بھرپور وکالت کو سراہا۔ دونوں رہنماؤں نے پاکستان اور فرانس کے درمیان خاص طور پر زراعت، لائیو سٹاک، آئی ٹی، مہارتوں کی ترقی اور پینے کے صاف پانی کے شعبوں میں کاروبار سے کاروباری رابطوں کے ذریعے تعاون بڑھانے پر اتفاق کیا۔ اس کے مثبت انداز پر اطمینان کا اظہار کرتے ہوئے دونوں رہنماؤں نے پاکستان فرانس تعلقات کے مکمل دائرہ کار بشمول سیاسی، اقتصادی، تجارتی اور سرمایہ کاری کے ساتھ ساتھ اقوام متحدہ سمیت کثیرالجہتی فورمز پر تعاون پر تبادلہ خیال کیا۔ وزیراعظم نے دونوں ممالک کے درمیان باہمی فائدہ مند اقتصادی اور تجارتی تعلقات کو مزید مضبوط بنانے کی ضرورت پر زور دیا اور فرانس کی حوصلہ افزائی کی کہ وہ پاکستان میں سرمایہ کاری کے مواقع سے فائدہ اٹھائے خاص طور پر موسمیاتی موافقت اور قابل تجدید توانائی کے شعبوں میں۔ دونوں رہنماؤں نے باہمی دلچسپی کے تمام علاقائی اور عالمی مسائل پر قریبی رابطے میں رہنے کی دونوں فریقوں کی مشترکہ خواہش کا بھی اعادہ کیا۔
