• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

لاس اینجلس، خوفناک آگ، 10 ہزار مکانات خاکستر، اموات 10 ہوگئیں، لاکھوں بے گھر

آج کا اخبار
اہم خبریں
11 جنوری ، 2025
کراچی (نیوز ڈیسک) امریکا کے شہر لاس اینجلس میں لگنے والی آگ میں ہلاکتوں کی تعداد 10ہوچکی ہے، 10ہزار مکانات و عمارتیں جل کر خاکستر ہو گئیں،ایک لاکھ 80 ہزار افراد نقل مکانی کر چکے ہیں اور مزید دو لاکھ شہریوں کے علاقہ چھوڑنے کا خدشہ ہے، 50ارب ڈالر نقصان کا اندیشہ، کروڑوں مالیت کے پرتعیش مکان راکھ کا ڈھیر، لاس اینجلس کاؤنٹی کے شیرف رابرٹ لونا کا کہنا ہے اس طرح لگ رہا ہے جیسے علاقے میں ایٹم بم گرایا گیا ہے۔معاشی اعدادوشمار کے امریکی ادارے جے پی مورگن نے کہا ہے آگ کے نتیجے میں 50ارب ڈالر نقصان کا اندیشہ ہے ، جنگل کی آگ کی وجہ سےپیسفک پیلیسیڈس میں کئی مشہور شخصیات کے گھربھی جل کر راکھ ہوگئے ہیں جہاں اوسطاً گھر کی قیمت 30لاکھ ڈالر سے زیادہ ہے۔لاس اینجلس میں لگی خوفناک آگ میں جہاں ہالی ووڈ پہاڑیوں کو شعلوں کی لپیٹ میں لیا وہیں قریب میں واقع متعدد ہالی ستاروں کے گھر راکھ کا ڈھیر بن چکے ہیں جن میں مشہور زمانہ اداکار بین افلیک اور پیرس ہلٹن بھی شامل ہیں، پیرس ہلٹن کے بارے میں بین الاقوامی خبر رساں ادارے نے رپورٹ کیا کہ انہوں نے اپنا گھر ٹی وی پر جلتے دیکھا۔دیگر اداکاروں میں انتھونی ہوپکنس، ایڈم بروڈی، بلی کرسٹل، پریٹ مونٹاگ، جان گڈمین، مائلز ٹیلر اور اینا فارس کے قیمتی کروڑوں ڈالرز مالیت کے گھر بھی آگ کی نذر ہوچکے ہیں۔ لاس اینجلس میں منگل کی صبح لگنے والی آگ کو تین روز ہو چکے ہیں جو پانچ مختلف مقامات پر بھڑک رہی ہے۔ آگ سے سب سے زیادہ نقصان پیسیفک پیلیسیڈز کے رہائشی علاقے اور پیساڈینا کاؤنٹی کے علاقوں میں ہوا ہے۔ جسے شہر کی تاریخ کی سب سے تباہ کن آگ قرار دیا جا رہا ہے۔مذکورہ دونوں علاقوں میں آگ کی وجہ سے 34 ہزار ایکٹر رقبہ جل کر خاک ہو گیا ہے جب کہ فائر فائٹرز آگ بجھانے کی کوششوں میں مصروف ہیں۔برطانوی خبر رساں ادارے کے مطابق جن مقامات پر آگ بجھا دی گئی ہے وہاں واپس آنے والے رہائشیوں کو راکھ کے سوا کچھ نہیں مل رہا۔لاس اینجلس کاؤنٹی کے شیرف رابرٹ لونا نے بڑے پیمانے پر ہونے والی تباہی کے پیشِ نظر ہلاکتوں میں اضافے کا خدشہ ظاہر کیا ہے۔پریس کانفرنس کے دوران لونا نے کہا کہ وہ اس وقت تک ہلاکتوں سے متعلق اعداد و شمار نہیں دے سکتے جب تک امدادی ٹیمیں گھر گھر جا کر چھان بین نہیں کر لیتیں۔لاس اینجلس شہر کے مختلف مقامات پر لگنے والی آگ کو مختلف نام دیئے گئے ہیں۔ پیسیفک پیلیسیڈز کے علاقے میں آگ کو پیلیسیڈز فائر اور پیساڈینا کی آگ کو ʼایٹون فائر کا نام دیا گیا ہے۔اسی طرح ہالی وڈ ہلز پر لگنے والی آگ کو ʼسن سیٹ فائر، روینا کی آگ کولڈیا فائر اور سانتا کلیریٹا کی آگ کو ʼہرسٹ فائر کا نام دیا گیا ہے۔لاس اینجلس کاؤنٹی کے شیرف رابرٹ لونا کے مطابق صرف ایٹون فائر کے نتیجے میں چار سے پانچ ہزار مکانات تباہ یا انہیں نقصان پہنچا ہے۔ دوسری جانب حکام کا کہنا ہے کہ پیلیسیڈز فائر سے 5300 مکانات مکمل طور پر تباہ ہو چکے ہیں۔ری پبلکن پارٹی سے تعلق رکھنے والے لاس اینجلس کے میئر کیرن باس کا کہنا ہے کہ ہم شہر کی دوبارہ تعمیر کے لیے تیار ہیں۔
اہم خبریں سے مزید