• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

اردو یونیورسٹی سے ملازمین کو فارغ کرنے کا سلسلہ جاری، 10 ماہ میں تیسرا رجسٹرار

آج کا اخبار
اہم خبریں
11 جنوری ، 2025
کراچی( سید محمد عسکری) وفاقی اردو یونیورسٹی سے کراچی کے ملازمین کو فارغ کرنے کا سلسلہ جاری ہے اب تک 60 سے زائد ملازمین کو فارغ کیا جاچکا ہے یا ان کے کنٹریکٹ میں توسیع نہیں کی گئی ہے۔جب کہ قائم مقام رجسٹرار ثمرہ ضمیر کو بھی ھٹا دیا گیا ہے اور ان کی جگہ مشیر امور طلبہ اسسٹنٹ پروفیسر سعدیہ خلیل کو رجسٹرار کے عہدے کا چارج دیا گیا ہے۔ موجودہ وائس چانسلر پروفیسر ضابطہ خان شنواری کے 10 ماہ کے دور میں یہ تیسری رجسٹرار ہیں۔ جمعہ کو سینئر افسران پی آر او اور فوٹو گرافر کے کنٹریکٹ میں توسیع نہیں کی گئی دونوں افراد کا تقرر سابق وائس چانسلر ڈاکٹر محمد قیصر کے دور میں ہوا تھا اور ہر سال ان کی مدت ملازمت میں توسیع کردی جاتی تھی۔ یاد رہے کہ موجود وائس چانسلر ڈاکٹر ضابطۂ خان شنواری کا تقرر سابق صدر عارف علوی نے 27 فروری 2024 کو کیا تھا وہ تیسرے نمبر پر تھے، پہلے نمبر پر زرعی یونیورسٹی پشاور کے وائس چانسلر ڈاکٹر جہاں بخت تھے دوسرے نمبر پر ڈاکٹر محمد علی شاہ تھے جو اب ملک کی سب سے بڑی یونیورسٹی جامعہ پنجاب کے وائس چانسلر مقرر ہوچکے ہیں۔ پہلے نمبر پر آنے والے امیدوار ڈاکٹر بخت جہاں نے اسلام آباد ہائی کورٹ میں تقرری کو چلینج بھی کر رکھا ہے۔
اہم خبریں سے مزید