فرمان الہی
نماز کے اوقات
کراچی (اسٹاف رپورٹر) امیر جماعت اسلامی پاکستان حافظ نعیم الرحمن نے کہا ہے کہ پیپلز پارٹی کی صوبائی حکومت نے اٹھارویں ترمیم کے ذریعے تمام اختیارات اور وسائل پر قبضہ تو کرلیا لیکن نچلی سطح پر اختیارات اور وسائل دینے کے لیے تیار نہیں۔ کچرا اٹھانے کا انتظام بھی پیپلز پارٹی کی صوبائی حکومت نے اپنے قبضے میں کرلیا ہے ۔یہ بات انھوں نے ہفتے کو جماعت اسلامی ضلع کورنگی کے تحت لانڈھی نمبر 4 میں عوامی دعوت افطار سے خطاب کرتے ہوئے کہی ،انھوں نے مزید کہا کہ شہر میں اس وقت پانی سب سے بڑا مسئلہ بنتا جارہا ہے۔ قابض مئیر سن لیں کہ پانی کی فراہمی شہریوں کا حق ہے سب کو انصاف کے ساتھ پانی کی تقسیم کی جائے۔ برسوں کے تباہ حال شہر کے عوام چاہتے تھے کہ اب کراچی کے مسائل حل ہوں اور منصوبے مکمل ہوں لیکن بد قسمتی سے اسٹبلشمنٹ کا سہارا لے کر پیپلز پارٹی نے مئیر شپ پر قبضہ کرلیا۔ جماعت اسلامی کے ٹاؤنز و یوسی چیئر مینز اپنی مدد آپ کے تحت کراچی میں عوام کے لیے ریلیف کے کام کررہے ہیں۔ جماعت اسلامی کراچی کے عوام کے ساتھ ہے ان کو تنہا نہیں چھوڑے گی۔ آنے والے دنوں میں جماعت اسلامی حقوق کراچی تحریک کے سلسلے میں ”ملین مارچ“ منعقد کرے گی اور وفاقی و صوبائی حکومتوں سے کراچی کا حق لے کر رہے گی دعوت افطار سے امیر جماعت اسلامی ضلع کورنگی مرزا فرحان بیگ نے بھی خطاب کیا۔
