• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

پشاور، دیہی علاقوں میں 100سے زائد کھیلوں کے میدان بنانے کا ہدف

میرا شہر
پشاور
19 مارچ ، 2025
پشاور (وقائع نگار) صوبائی دارالحکومت پشاور میں ضلعی انتظامیہ نے عوام کے تعاون سے دیہی علاقوں میں کھیلوں کے میدان بنانے کے اہم منصوبے پر کام جاری ہے اور اس سلسلے میں ڈپٹی کمشنر پشاور سرمد سلیم اکرم نے ایڈیشنل ڈپٹی کمشنر (جنرل) راؤ ہاشم عظیم کے ہمراہ ہزار خوانی میں کھیلوں کے میدانوں کا باقاعدہ افتتاح کیا۔ اس موقع پر ڈپٹی کمشنر پشاور نے کھلاڑیوں میں کھیلوں کا سامان بھی تقسیم کیا۔ ضلعی انتظامیہ پشاور کے مطابق، دیہی علاقوں میں سو سے زائد کھیلوں کے میدان بنانے کا ہدف رکھا گیا ہے۔ ان میدانوں کے قیام کا مقصد نوجوانوں اور بچوں کو کھیلوں کی جانب راغب کرنا اور انہیں مثبت سرگرمیوں میں مصروف رکھنا ہے، تاکہ وہ منفی سرگرمیوں سے محفوظ رہ سکیں ۔ افتتاح کے موقع پر ڈپٹی کمشنر پشاور سرمد سلیم اکرم نے کھلاڑیوں کے جوش و جذبے کو سراہا اور انہیں مزید بہتر کارکردگی کے لئےحوصلہ افزائی کی۔ڈپٹی کمشنر پشاور سرمد سلیم اکرم نے کہا کہ یہ میدان نوجوانوں اور بچوں کو اپنی صلاحیتوں کو نکھارنے اور صحت مند سرگرمیوں میں حصہ لینے کے مواقع فراہم کریں گے۔ انہوں نے مزید کہا کہ ضلعی انتظامیہ مقامی کمیونٹی کے تعاون کو سراہتی ہے اور اس قسم کے اقدامات سے معاشرتی ہم آہنگی اور کھیلوں کے فروغ میں مدد ملے گی اور عوامی شراکت داری سے جاری اس منصوبے کے ذریعے نہ صرف نوجوانوں اور بچوں کو صحت مند ماحول فراہم ہوگا بلکہ یہ اقدام علاقے کی مجموعی بہتری میں بھی معاون ثابت ہوگا۔ ضلعی انتظامیہ پشاور کی جانب سے نوجوانوں اور بچوں کو کھیلوں میں شرکت کی ترغیب دینے اور ان کی اخلاقی تربیت کے فروغ کے لئے اقدامات جاری ہے۔
پشاور سے مزید