فرمان الہی
نماز کے اوقات
نیویارک (عظیم ایم میاں) ٹرمپ انتظامیہ سے پاکستانی وفد کی پہلی باضابطہ ملاقات، وزیراعظم کے معاون خصوصی سید طارق فاطمی نے امریکی کانگریس کے بعض رہنمائوں سے ملاقات کی ہے، دو طرفہ تعلقات ، معاشی ترجیحات پر گفتگو۔
واشنگٹن میں پاکستانی سفارتخانہ کے جاری کردہ بیان کے مطابق امور خارجہ کمیٹی کے چیئرمین برائن ماسٹ اور ذیلی کمیٹی برائے سائوتھ اور سنٹرل ایشیا کی رینکنگ ممبر کے علاوہ امریکی کانگریس میں پاکستان کاکس کے شریک چیئرمین (ڈیموکریٹ) کانگریس مین ٹام سوازی اور ری پبلکن کانگریس مین جیک برگ مین سے ملاقاتیں کی ہیں۔
سفارتخانہ کے بیان کے مطابق طارق فاطمی نے دو طرفہ تعلقات اور پاکستانی حکومت کی معاشی ترجیحات کے بارے میں گفتگو کی ہے۔ تاہم سفارتخانہ کے ترجمان اور بیان ان ملاقاتوں کی تفصیل بتانے کےبارے میں گریزاں ہیں کہ یہ ملاقاتیں کب اور کہاں ہوئی ہیں۔
ادھر امریکی کانگریس کے محاذ پر پاکستان کے حوالے سے جو دو بل پیش کئے گئے ہیں ان میں پاکستان کو نان ناٹو اتحادی ملک کی حیثیت اور حاصل بعض مراعات کو واپس لینے کیلئے پیش کردہ بل کے بارے میں بھارتی لابی کی جانب سے تبصرے کئے جارہے ہیں جبکہ ایک دوسرے بل کے تحت فوج کے سربراہ پر امریکی ویزہ اور داخلہ پر پابندی کے بارے میں پی ٹی آئی کے حامی اپنی کامیابی اور محنت کا دعویٰ کررہے ہیں۔
امریکی ایوان نمائندگان کے بل نمبر 94کے تحت پاکستان کو حاصل نان ناٹو اتحادی ملک کے طور پر حاصل مراعات کو واپس لینے کے لئے کہا گیا ہے جبکہ ’’پاکستان ڈیموکریسی ایکٹ‘‘ کے عنوان سے پیش کردہ بل میں بانی پی ٹی آئی کی گرفتاری اور دیگر صورتحال کا ذکر کرتے ہوئے پاکستان میں جمہوریت اور انسانی حقوق کی صورتحال کو بحال کرنے کا مطالبہ کیا گیا ہے اور اس تمام صورتحال کی ذمہ داری کا فوج کے موجودہ سربراہ کو قرار دیا گیاہے۔
اس بل کے بارے میں امریکا میں پی ٹی آئی کے حامی بہت خوش نظر آرہے ہیں جبکہ بھارتی لابی ان دونوں مسودات کا خوب پرچار کررہے ہیں ان دونوں بلوں کو ابھی امریکی ایوان نمائندگان اور سینیٹ سے منظوری کے متعدد مراحل طے کرنا ہونگے اور ان کی منظوری کے بارے میں ابھی کوئی یقینی بات یا مدت کا تعین بھی نہیں کیا جاسکتا اس بارے میں بھی پاکستانی سفارتخانہ کے ترجمان خاموشی اختیار کئے ہوئے ہیں۔
