فرمان الہی
نماز کے اوقات
کراچی (اسٹاف رپورٹر )گلشن اقبال پولیس نے ڈیجیٹل پلیٹ فارم سائٹ کا استعمال کرتے ہوئے ڈکیتی اور اغوا کی درجنوں وارداتیں کرنے والے 2 جعلی پولیس اہلکاروں کو گرفتار کر لیا ،پولیس کے مطابق ملزمان نجی ڈیجیٹل سائٹ کا ڈیٹا چوری کر کے کسٹمرز کو ڈیلیوری کی موصولگی کے لیے رابطہ کرتے اور جعلی پولیس یونیفارم زیب تن کر کےہاؤس روبری، اغواء اور ڈکیتی کی وارداتیں کرتے تھے ،پولیس نے متعدد جائے وقوعہ سے موصولہ سی سی ٹی وی فوٹیجز کی مدد سے شناخت کے بعد بلاول خلجی ولد عبدالجبار خلجی اور سید وقاص حسین کو گرفتار کیا ،ملزمان سے دو غیر قانونی 30 بور پستول ، موبائل فونز، ایک عدد LED اور چھینی ہوئی گھڑیاں برآمد کرلیں ،ملزمان کے زیر استعمال جعلی نمبر پلیٹ لگی گاڑی قبضہ میں لے لی،پولیس نے بتایا کہ گرفتار ملزمان کی نشاندہی پر ڈکتی،ہاؤس روبری کی وارداتوں کے دوران لوٹا گیا سامان، تین پولیس یونیفارم، 8 عدد چھینے ہوئے موبائل فونز، موبائل فونز کے درجنوں کور، یونیفارم کے درجنوں بیج، مختلف موبائل سم اور 20 بیگ بھی برآمد کئے ہیں،ملزمان نے 6 مارچ 2025 کو گلشن اقبال بلاک ون میں گھر میں داخل ہوکر 4 موبائل فونز، ایک LED، طلائی زیورات، گھڑیاں اور رقم لوٹی اور متاثرہ شخص کو اغواء کر کے کراچی کے مختلف مقامات پر قائم ATM لے جاکر پیسے نکلوائے اور فرار ہوگئے، ملزمان نے 8 فروری 2025 کو گلشن اقبال بلاک 13/D میں پولیس یونیفارم میں تعارف کرواکر فلیٹ میں داخل ہو کر موبائل فون، ATM کارڈ اور گاڑی کے کاغذات اٹھا کر متاثرہ شخص کو گاڑی میں بٹھایا اور کراچی کے مختلف ATM اور ایزی پیسہ کی دکان سے پیسے نکلوائے اور گاڑی لیکر فرار ہوگئے،ملزمان نے دوران تفتیش کراچی اور کراچی سے باہر بھی متعدد وارداتیں کرنے کا انکشاف کیا ہے ۔
