فرمان الہی
نماز کے اوقات
کراچی (نیوز ڈیسک) ڈونلڈ ٹرمپ نے جمعہ کے روز اپنا سالانہ طبی معائنہ کروایا، جو ایک ایسا چیک اپ ہے جس سے عوام کو ممکنہ طور پر کئی سالوں بعد پہلی بار اس شخص کی صحت کے بارے میں تفصیلات معلوم ہو سکتی ہیں، جو جنوری میں امریکہ کی تاریخ میں صدر کا حلف اٹھانے والے معمر ترین شخص بنے۔ 78 سالہ شخص نے اپنے سوشل میڈیا سائٹ پر اس معائنے سے پہلے پوسٹ کیا، جو میری لینڈ کے بیتھسڈا میں والٹر ریڈ نیشنل ملٹری میڈیکل سینٹر میں کیا گیا’’میں نے کبھی اتنا اچھا محسوس نہیں کیا، لیکن بہر حال، یہ کام ضرور کرنے چاہئیں‘‘۔ یہ فوری طور پر واضح نہیں ہو سکا کہ معائنہ کتنی دیر تک جاری رہا۔ تاہم مجموعی طور پر انہوں نے ایئر فورس ون پر سوار ہوکر فلوریڈا ویک اینڈ کے لیے روانہ ہونے سے پہلے مرکز میں پانچ گھنٹے سے زیادہ وقت گزارا۔ اگرچہ انہوں نے طویل عرصے تک اپنے پیشرو جو بائیڈن کی جسمانی اور ذہنی صلاحیتوں پر سوالات اٹھائے، لیکن ڈونلڈ ٹرمپ نے اپنی صحت سے متعلق بنیادی حقائق کو معمول کے مطابق خفیہ رکھا ہے — اور طبی معاملات میں روایتی صدارتی شفافیت سے گریز کیا ہے۔ اگر تاریخ کو مدنظر رکھا جائے تو امکان یہی ہے کہ ان کا حالیہ طبی معائنہ بھی ایک تعریفی رپورٹ ہی سامنے لائے گا، جس میں تفصیلات کا فقدان ہو گا۔ وائٹ ہاؤس کی پریس سیکریٹری کیرولین لیوٹ نے وعدہ کیا کہ ’’وائٹ ہاؤس کے معالج کی جانب سے ایک رپورٹ‘‘ جاری کی جائے گی، ’’جیسے ہی ممکن ہو سکے‘‘۔ انہوں نے اشارہ دیا کہ یہ رپورٹ تفصیلی اور جامع ہوگی۔
