• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

اوساکا ایکسپو 2025، جاپانی وزیراعظم، پاکستانی سفیر بشیر تارڑ کی شرکت

آج کا اخبار
اہم خبریں
14 اپریل ، 2025
ٹوکیو (عرفان صدیقی) جاپان کے شہر اوساکا میں دنیا کی سب سے بڑی تجارتی اور ثقافتی نمائش’’ورلڈ ایکسپو 2025‘‘ کا باقاعدہ آغاز ہو گیا۔ افتتاحی تقریب میں جاپان کے وزیرِاعظم فومیو کشیدا نے خصوصی شرکت کی اور نمائش کی تھیم “ہماری زندگیوں کے لئے مستقبل کی سوسائٹی کو ڈیزائن کرنا‘‘ پر روشنی ڈالتے ہوئے کہا کہ یہ ایکسپو عالمی تعاون اور مشترکہ ترقی کی علامت ہے۔ پاکستان کے سفیر برائے جاپان رضا بشیر تارڑ نے بھی خصوصی شرکت کی۔پاکستانی سفیر رضا بشیر تارڑ کا کہنا تھا کہ پاکستانی پویلین دنیا بھر کے سیاحوں کے لئے کشش کا باعث بنے گا اور پاکستان کی معدنی دولت بالخصوص گلابی نمک کی عالمی مارکیٹ میں مزید رسائی پیدا ہوگی۔ پاکستانی سفیر نے اس موقع پر پاکستانی پویلین کا دورہ کیا اور نمائش میں پاکستان کی بھرپور شرکت کو سراہا۔ انہوں نے کہا کہ یہ ایکسپو پاکستان کے لئے اپنی ثقافت، مصنوعات اور سیاحت کو دنیا کے سامنے لانے کا سنہری موقع ہے۔افتتاحی روز عوامی دلچسپی دیدنی رہی، منتظمین کے مطابق تقریباً ڈیڑھ لاکھ افراد نے ایکسپو کا دورہ کیا، جو ان کی توقعات سے کہیں زیادہ تھا۔ ورلڈ ایکسپو 2025 جاپان کے شہر اوساکا میں 13 اپریل 2025 کو شروع ہوئی ہے اور یہ 13 اکتوبر 2025 تک جاری رہے گی۔ اس نمائش میں دنیا بھر کے 160 سے زائد ممالک اور بین الاقوامی تنظیمیں شریک ہیں۔ منتظمین کے مطابق 28 ملین (دو کروڑ اسی لاکھ) سے زائد زائرین کی آمد متوقع ہے۔پاکستان نے ایکسپو میں بھرپور شرکت کا اعلان کیا ہے، جہاں پاکستانی پویلین کا مرکزی فوکس گلابی نمک (Pink Salt) اور اس سے بنی مصنوعات پر رکھا گیا ہے۔ وفاقی وزیرِ تجارت جام کمال خان نے ٹریڈ ڈویلپمنٹ اتھارٹی آف پاکستان (TDAP) کو ہدایت دی ہے کہ وہ اس عالمی پلیٹ فارم پر پاکستانی مصنوعات کو بھرپور انداز میں متعارف کرائے اور میڈیا مہم کے ذریعے عالمی سطح پر تشہیر کرے۔دنیا بھر کے دیگر ممالک بھی اپنے انفرادی پویلینز کے ذریعے اپنی ثقافت، ایجادات اور مستقبل کے وژن کو پیش کر رہے ہیں۔
اہم خبریں سے مزید