• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ناخلف بیٹے نے سابق سکیورٹی گارڈ کے ذریعے والد کو قتل کروا دیا

آج کا اخبار
اہم خبریں
16 اپریل ، 2025
کراچی( ثاقب صغیر )کورنگی میں ناخلف بیٹے نے سابق سیکورٹی گارڈ کو پیسے دے کر والد کو قتل کروا دیا، ملزم کی بیوی اور خاتون دوست بھی قتل کی سہولت کار نکلیں،پولیس نے ملزم ،اس کے دو ساتھیوں اور دونوں خواتین کو گرفتار کر لیا۔تفصیلات کے مطابق زمان ٹاؤن تھانے کی حدود کورنگی 51-c میں 18 فروری 2025 کو سید محمد متین خان نامی شخص کو گھر کے قریب فائرنگ کر کے قتل کر دیا گیا تھا۔پولیس نے واقعہ میں ملوث مقتول کے بیٹے دانش، اسکی بیوی طوبیٰ ، دانش کی دوست ایمن اور دو ملزمان محمد ظریف اور شہید اللہ کو گرفتار کر کے ان کے قبضے سے نائن ایم ایم پستول اور تھانہ کورنگی صنعتی ایریا کی حدود سے چھینی گئی موٹر سائیکل برآمد کر لی۔مرکزی ملزم سیال خان کی گرفتاری کے لیے کوشش کی جا رہی ہے۔ایس ایچ او غلام نبی آفریدی نے بتایا کہ مقتول متین کیبل کا کام کرتا تھا اور ملزم دانش اپنے والد کے ساتھ کام کرتا تھا۔ملزم دانش کی ایمن نامی خاتون کے ساتھ دوستی ہو گئی جس کے بعد وہ پیسوں میں ہیر پھیر کرنے لگا۔ملزم کے والد کو پتا چلا تو انہوں نے 8 ماہ قبل ملزم دانش کو کام سے الگ کر دیا اور گھر سے نکال دیا جس کے بعد ملزم اپنے سسرال میں جا کر رہنے لگا۔انہوں نے بتایا کہ سسرال والوں نے اس کے والد کو سمجھایا تو وہ واپس گھر آ گیا اور کلفٹن میں ملازمت کرنے لگا جہاں اس کی ملاقات سیال خان نامی سیکورٹی گارڈ سے ہوئی جو بنوں کا رہائشی اور پیشہ ور ملزم تھا۔سیال خان نے بعد ازاں نوکری چھوڑ دی تاہم ملزم دانش اس سے رابطے میں رہا اور اس کے ساتھ مل کر وارداتیں بھی کرنے لگا۔ایس ایچ او نے بتایا کہ دو ماہ قبل ملزم کا اپنے باپ سے پھر جھگڑا ہوا جس پر اس کے باپ نے اسے بے عزت کیا تو ملزم نے سیال خان سے باپ کو قتل کرنے کی بات کی اور 3 لاکھ روپے میں معاملہ طے کیا۔ملزم دانش نے اپنی دوست ایمن سے 50 ہزار روپے لے کر سیال خان کو دئیے،ملزم ڈکیتی کی وارداتوں کے پیسے خاتون دوست کو دیتا تھا۔16 فروری کو ملزمان نے آپس میں میٹنگ کی۔سیال خان نے ملزم کو ایک سم لے کر دی جس کے ذریعے دونوں آپس میں رابطے میں رہے۔
اہم خبریں سے مزید