• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

مون سون کے حوالے سے انتظامات مکمل کئے جائیں، ڈی جی پنجاب واٹراینڈ سینی ٹیشن اتھارٹی

میرا شہر
اسلام آباد
20 اپریل ، 2025
راولپنڈی (خبر نگار خصوصی ) ڈائریکٹر جنرل پنجاب واٹراینڈ سینی ٹیشن اتھارٹی طیب فرید نے تمام واساز کی کارکردگی کے جائزے اور مون سون تیاریوں کے سلسلے میں اجلاس کی صدارت کرتے ہوئے کہا کہ واساز مون سون کی تیاریوں کو تیز کریں۔ سیور لائنوں ، نالوں کی صفائی ، ہیوی مشینری کی مرمت ، مون سون کیمپس کی بر وقت تنصیب کے ساتھ ساتھ تربیتی مشقیں اور نشیبی علاقوں کی نشاندہی 31 مئی تک مکمل کی جائےتاکہ پری مون سون سیزن جو 15 جون کو شروع ہوتا ہے اس سے پہلے تمام انتظامات مکمل ہوں۔ ڈی جی نے تمام واساز کی ریونیو ریکوری کا بھی جائزہ لیا اور کہا کہ پنجاب واسا اتھارٹی کے قیام کے بعد واسا کی کارکردگی کا انحصار ریونیو ریکوری پر ہے جس میں بہتری لائے بغیر کامیابی نا ممکن ہے اس لئے واساز کو اپنی ریونیو ریکوری پر خصوصی توجہ دینے کی ضرورت ہے۔ اس موقع پر منیجنگ ڈائریکٹر واسا نے بریفنگ میں بتایا کہ واسا راولپنڈی کا مون سون کی تیاریوں کے سلسلے میں سیور لائنوں کی صفائی پر کام تیزی سے جاری ہے جو 31 مئی سے پہلے مکمل کر لی جائے گی۔ ایم ڈی واسا نے مزید بتایا ہے کہ واسا راولپنڈی نے ضلعی انتظامیہ کے ساتھ مل کر نشیبی علاقوں کی نشاندہی مکمل کر لی ہے اور بارشوں کے دوران تربیت یافتہ عملہ ہیوی مشینری کے ساتھ ان پوائنٹس پر تعینات کیا جائے گا۔اجلاس میں پانچوں واسا کے منیجنگ ڈائریکٹر ز اور افسران نے شرکت کی۔
اسلام آباد سے مزید