فرمان الہی
نماز کے اوقات
اسلام آباد (خبر نگار) سپریم کورٹ میں زیر سماعت مخصوص نشستوں کے کیس میں 3متفرق درخواستیں دائر کر دی گئیں۔ سنی اتحاد کونسل کی جانب سے دائر درخواستوں میں بنچ پر اعتراض، کارروائی براہ راست نشر کرنے اور چھبیسویں ترمیم کیس کا فیصلہ کرنے کی استدعا کی گئی ۔ متفرق درخواستوں میں موقف اختیار کیا گیا کہ طے شدہ اصول ہے نظرثانی وہی بنچ سنتا ہے جس نے فیصلہ کیا ہو جبکہ ججز کی دستیابی کے باوجود نیا بنچ تشکیل نہیں دیا جا سکتا، مخصوص نشستوں کا کیس سننے والا بنچ سپریم کورٹ رولز کیخلاف تشکیل دیا گیا، نیا بنچ بننے سے نظرثانی اور اپیل میں فرق ختم کر دیا گیا، بنچ میں شامل 2ارکان کو نکالنا سمجھ سے بالاتر ہے، 13 رکنی بینچ کے فیصلے پر نظرثانی 11 ججز کیسے سن سکتے؟ آئینی بنچ کی تشکیل 26ویں ترمیم کے نتیجہ میں ہوئی جس کیخلاف مقدمات زیر التواء ہیں لہذا 26ویں ترمیم کی آئینی حیثیت کا تعین ہونے تک نظرثانی پر سماعت ملتوی کی جائے۔درخواست میں مزید کہا گیا کہ اہم ترین کیس کی عدالتی کارروائی براہ راست نشر کی جائے۔ نظرثانی کیس پر سماعت کیلئے مخصوص نشستوں کے کیس کا اصل بنچ تشکیل دیا جائے اور چھبیسویں ترمیم اور آئینی بنچ کی قانونی حیثیت کا تعین ہونے تک سماعت ملتوی کی جائے۔
