• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

سرکاری ٹیلی ویژن کےملازمین کو HEC سے تصدیق شدہ مستند تعلیمی اسناد جمع کرانے کی ہدایت

آج کا اخبار
ملک بھر سے
03 جون ، 2025
اسلام آباد(فاروق اقدس) سرکاری ٹیلی ویژن ہیڈکوارٹرز نے تمام ریگولر، کنٹریکٹ اور پروفیشنل ملازمین کو اعلیٰ تعلیمی کمیشن سے ڈگری تصدیق کرانے کے لیے حتمی نوٹس جاری کر دیا ۔ ٹی وی انتظامیہ کا کہنا ہے کہ جن ملازمین نے 31 جنوری 2025 کی مقررہ ڈیڈلائن تک ہدایات پر عمل نہیں کیا، انہیں ایک ہفتے کی مہلت دی جا رہی ہے کہ وہ ہائر ایجوکیشن کمیشن سے تصدیق شدہ اپنی ڈگریوں کی نقول متعلقہ شعبے میں جمع کرائیں۔انتظامیہ نے واضح کیا ہے کہ مقررہ مدت میں ڈگری ویریفیکیشن مکمل نہ کرنے والے ملازمین کے خلاف سخت تادیبی کارروائی کی جائے گی، جس میں معطلی، تنزلی اور حتیٰ کہ ملازمت کے خاتمے جیسے اقدامات بھی شامل ہو سکتے ہیں۔ڈائریکٹر ایڈمنسٹریشن نے تمام ملازمین کو فوری طور پر ڈگری تصدیق کا عمل مکمل کرنے کی ہدایت جاری کر دی ہے، جبکہ تمام مراکز کو تحریری ہدایت نامہ بھی بھیج دیا گیا ہے اور اس پر عملدرآمد کی رپورٹ بھی طلب کر لی گئی ہے۔ٹی وی انتظامیہ نے دوٹوک موقف اختیار کرتے ہوئے کہا ہے کہ ڈگری تصدیق میں کسی قسم کی کوتاہی یا تاخیر برداشت نہیں کی جائے گی۔ قانون کے مطابق سرکاری ادارے میں ملازمت کے لیے مستند اور تصدیق شدہ تعلیمی اسناد بنیادی ضرورت ہیں، اور اس پالیسی پر مکمل عملدرآمد ادارے کی ساکھ اور شفافیت کے لیے ناگزیر ہے۔یہاں یہ بات قابل ذکر ہے کہ ٹی وی کے تمام سینٹرز میں ریگولر،جزوقتی ملازمین کی بڑی تعداد جو نہ صرف تعلیمی قابلیت کے تقاضے پورے نہیں کرتی بلکہ جن ذمہ داریوں پر ان کی تقرری کی گئی ہے اس کے بھی اہل نہیں اور یہ تمام تقرریاں سیاسی بنیادوں اور سفارشوں پر کی گئی ہیں۔ ٹی وی کے ذرائع کا یہ بھی کہنا ہے کہ بیشتر ملازمین کی ادارے سے دلچسپی صرف تنخواہیں حاصل کرنے کی حد تک ہے۔
ملک بھر سے سے مزید