فرمان الہی
نماز کے اوقات
بھارت میں ایک خاتون نے آن لائن کمائی کے چکر میں 1 لاکھ روپے کا نقصان ہونے پر مبینہ طور پر خودکشی کرلی۔
بھارتی میڈیا کے مطابق حیدرآباد سے تعلق رکھنے والی گنگا انوشہ نامی خاتون کو آن لائن کمانے کے چکر میں فراڈ کا سامنا کرنا پڑگیا۔
خاتون کو سوشل میڈیا پر گھر بیٹھے کام کےلیے ایک اشتہار نظر آیا تھا، جس میں آسان آمدنی کا وعدہ کیا گیا تھا۔ فراڈ کرنے والوں نے ان سے پہلے ایک ہزار روپے کی رقم منگوا کر انوشہ کو ایک جعلی "منافع" کی رقم 7 ہزار روپے دکھائی، جو حقیقت میں کبھی اس کے بینک اکاؤنٹ میں نہیں پہنچی۔
جب انوشہ نے اپنی کمائی نکالنے کی کوشش کی تو فراڈ کرنے والوں نے مزید سرمایہ کاری کا مطالبہ کیا۔ اپنی ابتدائی رقم واپس پانے کی امید میں، انہوں نے اپنا سونا بیچ کر مزید رقم فراہم کی لیکن وہ اس جال میں پھنستی گئی اور تقریباً 1 لاکھ روپے کا نقصان اٹھا لیا۔
خاتون کی بار بار کوششوں کے باوجود اس کا فراڈ کرنے والوں سے رابطہ نہیں ہو سکا اور اس مالی نقصان کے باعث وہ شدید ذہنی دباؤ کا شکار ہو گئی، جو افسوسناک طور پر ان کی خودکشی کا سبب بنا۔
خودکشی سے قبل خاتون نے ایک خط چھوڑا جس میں انہوں نے دوسروں کو سوشل میڈیا پر اس قسم کے فراڈ سے خبردار کرتے ہوئے ہوشیار رہنے کی تاکید کی۔
پولیس نے معاملے کا مقدمہ درج کر کے سائبر فراڈ کی تحقیقات شروع کر دی ہیں۔
