فرمان الہی
نماز کے اوقات
پاکستانی شوبز انڈسٹری کے مشہور اداکار اور ٹیلی ویژن میزبان فہد مصطفیٰ پر شوبز انڈسٹری سے وابستہ فوٹو گرافر عمر سعید نے ایک ویڈیو جاری کرتے ہوئے سنگین الزامات لگادیے۔
فوٹوگرافر عمر سعید نے اپنے سوشل میڈیا اکاؤنٹ پر ایک ویڈیو پوسٹ کرتے ہوئے انکشاف کیا کہ فہد مصطفیٰ نے انہیں سیٹ پر کئی بار سب کے سامنے رسوا کیا اور بعد ازاں نوکری سے بھی نکلوا دیا۔
عمر نے بتایا کہ میں نے یہ ویڈیو دو سال بعد اس لیے پوسٹ کی ہے کیونکہ اب میرے پاس اپنی روزی کمانے کا ذریعہ ہے اور میں سچ بولنے کے لیے آزاد ہوں۔
عمر سعید نے لکھا کہ مجھے کئی بار ذلیل کیا گیا، میں خاموش رہا انہوں نے میرا کیریئر برباد کیا۔ الحمداللّٰہ آج میں اپنا کاروبار کر رہا ہوں اور اپنے خاندان کا کفیل ہوں، اب وقت ہے کہ ان کی اصل حقیقت سامنے لائی جائے۔
انہوں نے مزید کہا کہ اللّٰہ ہی جانتا ہے کہ کتنے لوگ ایسے رویوں کا شکار ہوتے ہیں، دوسروں کے ساتھ ویسا ہی سلوک کرو جیسا تم اپنے لیے چاہتے ہو۔
ویڈیو کے وائرل ہونے کے بعد سوشل میڈیا صارفین کی بڑی تعداد فوٹوگرافر کی حمایت میں سامنے آگئی اور فہد مصطفیٰ کے رویے کو تنقید کا نشانہ بنایا جارہا ہے۔
فہد مصطفیٰ کی جانب سے تاحال اس معاملے پر کوئی ردِعمل سامنے نہیں آیا۔
