فرمان الہی
نماز کے اوقات
کراچی (عبدالماجد بھٹی) انگلینڈ میں ورلڈ چیمپئن شپ آف لیجنڈز میں بھارت نے پاکستان کے خلاف جانب دارانہ، دوہرے معیار اور متعصبانہ رویہ اختیار کرتے ہوئے گروپ میچ اور سیمی فائنل کھیلنے سے انکار کردیا تھا۔ غیر معمولی حالات کے پیش نظر پاکستان کرکٹ بورڈ نے پرائیویٹ لیگ میں پاکستان کا نام استعما ل کرنے اور آئندہ اس ٹورنامنٹ میں شرکت پر پابندی کا فیصلہ کیا ہے۔ چیئرمین بورڈ محسن نقوی کی زیر صدارت بورڈ آف گورنرز کا خصوصی اجلاس ہوا۔ پی سی بی نے کہا کہ آئندہ پاکستانی کھلاڑیوں کو ایسے مقابلے میں شرکت کی اجازت نہیں دی جائے گی جسے سیاست کی تنگ نظری نے داغدار کر دیا ہو۔ پاکستان چیمپئنز ٹیم کے مالک سابق کپتان وقار یونس کے ہم زلف کامل خان تھے۔ ٹورنامنٹ بھارتی اداکار اجے دیوگن کی کمپنی نے کرایا جس میں شاہد آفریدی، وہاب ریاض ، سعید اجمل، کامران اکمل اور محمد حفیظ سمیت کئی مشہورریٹائرڈ کھلاڑیوں نے شرکت کی۔ وہاب ریاض پی سی بی میں اہم عہدے پر فائز ہیں۔یاد رہے کہ لیجنڈز لیگ کے فائنل میں پاکستانی کھلاڑیوں پر مشتمل ٹیم کو شکست ہوئی تھی۔ لیکن کپتان محمد حفیظ نے کہا کہ ہمارا مقصد نتائج کی پرواہ کئے بغیر دیانتداری ، عزت اور اسپرٹ آف دی گیم کا بھرپور خیال رکھنا تھا۔ پی سی بی نے کہا کہ ڈبلیو سی ایل نے جان بوجھ کر میچ نہ کھیلنے والی ٹیم کو پوائنٹس دینے کا یکطرفہ فیصلہ کیا جو کھیل کی روح کے منافی ہے۔ بین الاقوامی کھیلوں کی دنیا میں یہ دوغلا اور متعصبانہ رویہ ناقابل برداشت اور ناقابل قبول ہے۔ پاکستان لیجنڈز میچ کی منسوخی کے حوالے سے بورڈ آف گورنرز پی سی بی کی جاری کردہ پریس ریلیز کے مطابق کھیلوں کو سیاسی مفادات اور محدود کمرشل ترجیحات کے تابع کر کے چیمپئن شپ کے بڑے مقصد کو روندا گیا۔ پی سی بی ہمیشہ سے کھیل کو سیاست سے الگ رکھنے کا علمبردار رہا ہے۔ ٹورنامنٹ کے بنیادی اصولوں کو کسی بھی غیر مرئی دباؤ کے تحت پامال کرنا افسوسناک جبکہ منتظمین کا جانبدارانہ رویہ مستقبل کیلئے خطرناک اور تشویشناک ہے۔ ڈبلیو سی ایل کی جانب سے معذرت بلاواسطہ اعتراف ہے کہ میچ کی منسوخی کھیلوں کے اصولوں پر نہیں بلکہ مخصوص قوم پرستی کے بیانیے کے دباؤ پر ہوئی۔ اجلاس میں پی سی بی بورڈ آف گورنرز کے ممبران ظہیر عباس، زاہد اختر زمان، سجاد علی کھوکھر،ظفر اللہ، تنویر احمد، محمد اسماعیل قریشی، انوار احمد خان، طارق سرور ، چیف آپریٹنگ آفیسر پی سی بی سمیر احمد ، چیف ایگزیکٹو آفیسر پی ایس ایل سلمان نصیر، چیف فنانشل آفیسر جاوید مرتضی، ڈائریکٹر انٹرنیشنل کرکٹ عثمان واہلہ شریک ہوئے۔
