فرمان الہی
نماز کے اوقات
ڈیلس (رپورٹ: راجہ زاہد اختر خانزادہ، نمائندہ جیو نیوز، جنگ) امریکہ میں پاکستان کے سفیر رضوان سعید شیخ نے کہا ہے کہ پاکستان اور امریکہ کے تعلقات کسی وقتی یا عارضی کیفیت کا نام نہیں بلکہ یہ ناگزیر، تزویراتی اور خطے کے امن و معاشی استحکام کے لیے بنیادی اہمیت رکھتے ہیں۔ انہوں نے کہا کہ دونوں ملکوں کی قیادت یہ واضح کر چکی ہے کہ تجارت اور سرمایہ کاری کے ذریعے طویل المدتی شراکت داری قائم کی جائے گی اور یہ تعلقات محض ’’رومانس‘‘ نہیں بلکہ ایک حقیقت ہیں جو مستقبل میں مزید گہرے ہوں گے۔ڈیلس کے دورے کے موقع پر نمائندہ جیو نیوز راجہ زاہد اختر خانزادہ سے خصوصی گفتگو کرتے ہوئے سفیر پاکستان نے کہا کہ پاکستان اور امریکہ دنیا کے بڑے ممالک میں شمار ہوتے ہیں۔ پاکستان آبادی کے لحاظ سے دنیا کا پانچواں بڑا ملک ہے اور اگلی دو سے ڈھائی دہائیوں میں یہ تیسرا بڑا ملک بن سکتا ہے۔ ایسے میں امریکہ اور پاکستان کے درمیان تعلقات کسی اختیار یا چوائس کا نتیجہ نہیں بلکہ ایک لازمی حقیقت ہیں، کیونکہ یہ خطے کے امن، عالمی ہم آہنگی اور دونوں ملکوں کے معاشی مفاد کے لیے ناگزیر ہیں۔
