• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

متاثرین کی مکمل بحالی تک کا سفر جاری رکھا جائے گا، سیدفخرجہاں

میرا شہر
پشاور
20 اگست ، 2025
پشاور (خصوصی نامہ نگار) خیبر پختونخوا کے وزیر کھیل وامور نوجوانان سید فخر جہان سے بونیر میں مختلف فلاحی اداروں کے سربراہان اور و نمائندوں نے ملاقات کی۔ ملاقات کرنے والوں میں ہلالِ احمر پاکستان، شفاء فاؤنڈیشن اور دیگر فلاحی تنظیموں کے نمائندگان شامل تھے۔ اس موقع پر سیلاب متاثرین کی بحالی اور ریلیف سرگرمیوں پر تفصیلی گفتگو کی گئی۔ صوبائی وزیر سید فخر جہان نے رفاہی اداروں کے کردار کو سراہتے ہوئے کہا کہ حالیہ تباہ کن سیلاب میں ان متاثرین کی بحالی اور امداد کیلئے فلاحی اداروں اور تنظیموں کی خدمات قابلِ تحسین ہیں امید ہے کہ یہ ادارے متاثرہ علاقوں کے عوام کی مکمل بحالی تک اپنی کوششیں جاری رکھیں گے۔ انہوں نے کہا کہ بونیر کے متاثرہ علاقوں میں ریلیف سرگرمیاں تیز رفتاری سے جاری ہیں۔ انہوں نے فلاحی اداروں پر زور دیا کہ وہ بالخصوص بونیر کے متاثرہ علاقوں میں اپنی سرگرمیوں کو مزید تیز کریں تاکہ متاثرہ عوام کو فوری سہولت مل سکے۔ وزیر کھیل و امور نوجوانان نے اس عزم کا اعادہ کیا کہ صوبائی حکومت متاثرین کو ہرگز تنہا نہیں چھوڑے گی فلاحی اداروں، رضاکاروں کی اجتماعی کوششوں سے مکمل بحالی تک کا سفر جاری رکھا جائے گا۔ فلاحی اداروں کے نمائندگان نے صوبائی وزیر کے کردار کو سراہا اور یقین دلایا کہ وہ متاثرین کی بحالی کے عمل میں حکومت کے ساتھ تعاون جاری رکھیں گے۔ دریں اثنا،صوبائی وزیر سے ڈپٹی کمشنر آفس بونیر میں فکس اِٹ ٹیم کی ملاقات ہوئی جس میں ادارے کے بانی عالمگیر خان اور خیبر پختونخوا کے سربراہ عدنان خان شریک تھے۔ ملاقات میں ڈپٹی کمشنر کاشف قیوم بھی موجود تھے۔ صوبائی وزیر نے فکس اِٹ ٹیم کو بونیر آمد پر خوش آمدید کہا اور متاثرین کی خدمت کے لئے ان کے جذبے کو سراہا۔ فکس اِٹ ٹیم نے ضلعی انتظامیہ کے تعاون سے میدان میں جا کر سیلاب متاثرین کی بحالی اور ریلیف سرگرمیاں شروع کر دی ہیں۔
پشاور سے مزید