فرمان الہی
نماز کے اوقات
جدہ (شاہدنعیم) سعودی عرب میں پہلی مرتبہ نیا تعلیمی سال دو مرحلوں میں شروع ہورہا ہے جہاں 11 ریجنز میں آج اتوار سے سکول کھل جائیں گے جب کہ مکہ مکرمہ، مدینہ منورہ، جدہ اور طائف میں اتوار 31 اگست کو سکول کھلیں گے۔6 ملین سے زائد طلبہ و طالبات آج اتوارکو تعلیمی اداروں میں واپس اپنے تعلیمی سفر کا آغاز کریں گے، نئے تعلیمی سال کے آغاز کے ساتھ ہی تمام علاقوں کی تعلیمی انتظامیہ نے اپنی تیاریاں مکمل کر لی ہیں جن میں آپریشنل و مینٹی ننس منصوبے اور جامع سہولیات شامل ہیں تاکہ ایک محفوظ اور ترغیب بخش تعلیمی ماحول فراہم کیا جا سکے جو طلبہ میں نظم و ضبط اور محنت کی اقدار کو پروان چڑھائے اور ایک باہمت نسل کی تیاری میں مدد دے اور قومی ترقی میں کردار ادا کرے۔ وزارتِ تعلیم نے کامیاب آغاز کو یقینی بنانے کے لیے خصوصی اقدامات کیے ہیں، جن میں 75 نئے تعمیری منصوبوں کی تکمیل شامل ہے جن پر 920 ملین ریال کی لاگت آئی ہے۔ مزید برآں 15 ہزار سے زیادہ اسکول عمارتوں اور 884 ہزار سے زائد ایئر کنڈیشننگ یونٹس کی مرمت و دیکھ بھال پر دوبلین ریال سے زیادہ خرچ کیا گیا۔ اسی طرح 1400 سے زائد تعلیمی عمارتوں کی بحالی اور ترقیاتی کام 782 ملین ریال کی لاگت سے مکمل کئے گئے تاکہ سہولیات کی کارکردگی بڑھے اور تعلیمی ماحول کے معیار میں بہتری آئے۔
