فرمان الہی
نماز کے اوقات
اسلام آباد (جنگ رپورٹر)چیف جسٹس پاکستان ،مسٹر جسٹس یحییٰ آفریدی نے پیر 8ستمبر کو سپریم کورٹ کے تمام ججوں پر مشتمل فل کورٹ اجلاس طلب کرلیا ، ذرائع کے مطابق فل کورٹ اجلاس دن ایک بجے منعقد ہوگا ،جس کی صدارت چیف جسٹس یحیٰ آفریدی کریں گے ،اجلاس صرف ترمیمی سپریم کورٹ رولز 2025کا جائزہ لینے کے ایک نکاتی ایجنڈا پر مشتمل ہوگا،اس حوالہ سے سپریم کورٹ بار ایسوسی ایشن نے تحریری طور پر اپنے تحفظات اور تجاویز سپریم کورٹ کو بجھوادی ہیں،تجاویز میں عدالتی فیسوں میں حالیہ اضافہ کی واپسی کا مطالبہ بھی کیا گیا ہے ، تاحال کسی جج نے رولز میں ترامیم کیلئے تجاویز جمع نہیں کروائیں،ذرائع کے مطابق سپریم کورٹ رولز 2025 ایک سرکولیشن کے ذریعے نافذ کئے گئے تھے، اگرچہ اکثریتی رائے سے سپریم کورٹ رولز 2025منظور کیے گئے تھے تاہم اختلاف کرنے والے ججوں کی رائے تھی کہ ترمیم شدہ رولز کوفل کورٹ اجلاس میں پیش کرکے تمام ججوں کی رائے لی جائے ،ذرائع کے مطابق اختلاف کرنے والے ججوں نے 15 دن گزرنے کے باوجودتاحال کوئی تجاویز نہیں دی ہیں، ذرائع کا کہنا ہے کہ اجلاس میں سپریم کورٹ بار ایسوسی ایشن کی تجاویزپر غورکیا جائے گا، فل کورٹ سے قبل سپریم کورٹ میں نئے عدالتی سال کی تقریب بھی منعقد ہوگی اورچیف جسٹس سپریم کورٹ میں قائم کیے گئے سہولت مرکز کا افتتاح بھی کریں گے ۔
