• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

بزرگ شہریوں کیلئے سہولتوں کی فراہمی یقینی بنائیں گے، قاسم علی شاہ

میرا شہر
پشاور
05 اکتوبر ، 2025
پشاور(نیوزڈیسک)محکمہ سماجی بہبود، خصوصی تعلیم و خواتین بااختیاری، حکومت خیبر پختونخوا نے بین الاقوامی یومِ بزرگ شہری 2025 شاندار انداز اور بھرپور جوش و جذبے کے ساتھ منایا۔اس حوالے سے محکمہ سماجی بہبود کی میزبانی اور فاؤنڈیشن فار ایجنگ اینڈ انکلوسیو ڈویلپمنٹ کے اشتراک سے تقریب کاانعقادکیاگیا۔ سلمیٰ ملک ڈپٹی ڈائریکٹر خواتین بااختیاری کی نگرانی میں منعقدہ تقریب میں مہمانِ خصوصی وزیر برائے سماجی بہبود، سید قاسم علی شاہ تھے جبکہ سماجی بہبود کے ایڈیشنل سیکریٹری، عمرا خان نے تمام معزز مہمانوں اور شرکاء کو خوش آمدید کہا۔تقریب میں وزیراعلیٰ کے مشیر برائے اقلیتی امور وزیر زادہ کیلاش نے خصوصی شرکت کی۔ معزز مہمانوں میں ڈائریکٹر جنرل پاپولیشن ویلفیئر، ریحان گل خٹک؛ ایڈیشنل سیکریٹری اوقاف، جناب حبیب آفریدی، جمشید علی خان؛ چیئرمین سوشل سائنسز، پروفیسر ڈاکٹر عزیزالرحمٰن،سی ای او فاؤنڈیشن فار ایجنگ اینڈ انکلوسیو ڈویلپمنٹ (FAID)، سید معیز الدین, ڈپٹی ڈائریکٹر نادرا، شاہد خان ودیگر شامل تھے۔وزیر سماجی بہبود، سید قاسم علی شاہ نے اپنے خطاب میں اعلان کیا کہ حکومت بزرگ شہریوں کے لیے خصوصی گھروں اور سفری سہولیات کی فراہمی کو یقینی بنائے گی تاکہ وہ باعزت اور آسان زندگی گزار سکیں۔ انہوں نے یہ بھی کہا کہ والدین کی بے ادبی یا اُن کی تذلیل کرنے والوں کے خلاف سخت قانون بنایا جائے گا اور ایسے عناصر کو کڑی سزائیں دی جائیں گی تاکہ معاشرے میں والدین کے احترام اور حقوق کا تحفظ یقینی بنایا جا سکے۔انہوں نے مزید کہا کہ بزرگ ہمارے قومی ورثے اور قیمتی اثاثے ہیں، ان کے تجربات اور دعاؤں کے بغیر کوئی معاشرہ ترقی نہیں کر سکتا۔ بزرگوں کی خدمت دراصل اللہ کی رضا اور قومی ترقی کی ضمانت ہے۔ وزیر موصوف نے نوجوان نسل پر زور دیا کہ وہ اپنے والدین اور بزرگوں کے ساتھ حسنِ سلوک کو اپنا شعار بنائیں کیونکہ یہی ہماری تہذیبی اور دینی اقدار کی اصل روح ہے۔پروفیسر ڈاکٹر عزیز الرحمٰن نے بطور محقق بزرگ شہریوں کے حوالے سے ریاستی ذمہ داریوں پر ایک جامع پریزنٹیشن پیش کی، جس میں انہوں نے پالیسی سطح پر مزید بہتری اور عملی اقدامات کی ضرورت پر زور دیا۔وزیراعلیٰ کے مشیر برائے اقلیتی امور نے بھی تقریب سے خطاب کیا اور کہا کہ خیبرپختونخوا حکومت اقلیتوں کے حقوق کے تحفظ، اُن کی سماجی شمولیت اور انہیں زندگی کی بنیادی سہولیات فراہم کرنے کے لیے پرعزم ہے۔ دیگرمقررین نےبزرگ افراد کے لیے صحت کی سہولیات تک آسان رسائی، سماجی تحفظ اور شمولیت کی اہمیت پر زور دیا۔تقریب میں مختلف سماجی کارکنان، محکمہ سماجی بہبود کے سینئر افسران بشمول ڈائریکٹر خصوصی تعلیم، ڈپٹی ڈائریکٹرز، ضلعی سماجی بہبود افسران، بزرگ شہری، وکلاء، خواجہ سرا نمائندگان، ماہرین تعلیم اور میڈیا سے تعلق رکھنے والے افراد نے بھی شرکت کی۔
پشاور سے مزید