• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

زرعی حکام کو سیلاب سے متاثرہ آم کے باغات کا سروے کرنے کی ہدایت

میرا شہر
ملتان
06 اکتوبر ، 2025
ملتان(سٹاف رپورٹر)سیکرٹری زراعت پنجاب افتخار علی سہو کی زیر صدارت ملتان میں آم کے باغات پر سیلاب کے اثرات کے حوالے سے ایک اہم جائزہ اجلاس منعقد ہوا۔ اجلاس میں سیلاب سے متاثرہ آم کے باغات کی صورتحال کا تفصیلی جائزہ لیا گیا۔اس موقع پر سیکرٹری زراعت پنجاب افتخار علی سہو نے ہدایت کی کہ سیلاب سے متاثرہ آم کے باغات کا سروے کیا جائے۔ انہوں نے کہا کہ مینگو ریسرچ انسٹیٹیوٹ اور محکمہ زراعت توسیع کے متعلقہ افسران کو نقصان کے سروے کا ٹاسک سونپ دیا گیا ہے۔سیکرٹری زراعت نے مزید ہدایت دیتے ہوئے کہا کہ سروے کے دوران آم کے متاثرہ پودوں کی صحت بارے ایڈوائزری بھی جاری کی جائے تاکہ باغات کی بحالی ممکن ہو سکے۔ انہوں نے مزید کہا کہ سیلاب کی وجہ سے کبیروالا، ملتان، جلال پور پیر والا اور علی پور میں آم کے باغات بری طرح متاثر ہوئے ہیں۔افتخار علی سہو نے کہا کہ پاکستانی آم کی ملکی و غیر ملکی منڈیوں میں بڑی مانگ ہے اور آم کی کوالٹی اور پیداوار میں اضافہ کے لیے ٹھوس عملی اقدامات اٹھائے جا رہے ہیں۔ انہوں نے مزید بتایا کہ 75 کروڑ روپے کی لاگت سے آم کی پیداوار میں اضافہ کے پروگرام پر عملدرآمد جاری ہے۔اجلاس میں سپیشل سیکرٹری زراعت جنوبی پنجاب سرفراز حسین مگسی، وائس چانسلر ایم این ایس زرعی یونیورسٹی ملتان پروفیسر ڈاکٹر آصف علی، ڈائریکٹر جنرلز محکمہ زراعت پنجاب عبدالحمید، نوید عصمت کاہلوں، ڈاکٹر عامر رسول، کنسلٹنٹ محکمہ زراعت ڈاکٹر محمد انجم علی سمیت مینگو گروورز نے شرکت کی۔
ملتان سے مزید